ԱՄՆ-ն իր դիվանագետներին կոչ է արել խուսափել Երուսաղեմի Հին քաղաք այցելելուց

Իսրայելում ԱՄՆ դեսպանատունը կոչ է անում իր աշխատակիցներին և նրանց ընտանիքներին՝ խուսափել օկուպացված Արևելյան Երուսաղեմի Հին քաղաք այցելելուց։

Դիվանագիտական առաքելության հաղորդագրության մեջ նշվում է, որ, անվտանգության նկատառումներից ելնելով, ԱՄՆ քաղաքացիներին խորհուրդ է տրվում լինել զգոն և համապատասխան միջոցներ ձեռնարկել անվտանգության իրազեկվածության բարձրացման համար։

«Երուսաղեմի Հին քաղաքի տարածքում անվտանգության վերջին միջադեպերի հետ կապված՝ ԱՄՆ դիվանագիտական ներկայացուցչություններին և նրանց ընտանիքներին խորհուրդ է տրվել հեռու մնալ Հին քաղաքից մինչև հետագա ծանուցումը»,- ասվում է հաղորդագրության մեջ:

ԱՄՆ քաղաքացիներին կոչ է արվել «խուսափել ցույցերից և մարդաշատ վայրերից, հետևել տեղական լրատվամիջոցներին և  տեղական իշխանությունների ցուցումներին»։

Իսրայելի ոստիկանությունը նոյեմբերի 21-ին հաղորդել է Արևելյան Երուսաղեմի Հին քաղաքի տարածքում զինված միջադեպի մասին։ Միջադեպի հետևանքով զոհվել է մեկ հրեա վերաբնակիչ, ևս երեքը վիրավորվել են, այդ թվում՝ երկու ոստիկան: