Գորիս-Կապան այլընտրանքային ճանապարհին խոշոր խցանումներ են, երբ դեռ ձյուն չկա․ Ճակատենի ճանապարհը կորցնելով՝ 4 գյուղերի բնակիչները 10 կմ-ի փոխարեն պետք է 150 կմ անցնեն՝ Կապան հասնելու համար․ Հակոբյան

Նա հիշեցրեց՝ ադրբեջանական զինուժն ամեն օր ավելի է խորանում ՀՀ սուվերեն տարածքում, օրինակ՝ Գորիս-Կապան ճանապարհին։ «Մնացորդում ունենք այլընտրանքային ճանապարհ, որը Գորիսը Տաթևով կապում է Կապանին։ Այդ ճանապարհը խնդրահարույց է, նախագիծն արվել է սխալներով»,- ասաց պատգամավորը՝ նշելով, որ արդեն խնդիրներ են առաջացել։

«Խոշոր խցանումներ կան, երբ դեռ ձյուն չի եկել, մառախուղ չկա, ճանապարհը սառցապատված չէ։ Ճակատենի ճանապարհն էլ կորցնելով՝ մեր 4 գյուղերի հայրենակիցները՝  600 հոգի, մնացին շատ բարդ կացության մեջ։ Եթե 10 կմ հատելով  էին հասնում Կապան, հիմա ստիպված պետք է գնան Մեղրիով, Քաջարանով, 150 կմ շրջանց կատարելով՝ հասնեն Կապան»,- ասաց Հակոբյանը՝ նշելով, որ կառավարությունն այդ անվտանգային հարցերը լուծելու փոխարեն բեմադրություններ է անում։ 

«Նախարարներ է նշանակում, նախարարներ է հանում։ Ինչո՞ւ հեռացվեց պաշտպանության նախարարը․ որ պատշաճ դիմադրություն չէ՞ր իրականացրել, թե՞ հակառակը։ Ինչո՞ւ հանրությունը պատճառները չգիտի, և ի՞նչ կապ ունի Սուրեն Պապիկյանը ՊՆ-ի հետ»,- նշեց պատգամավորը։