Թուրքիայի մասնակցությունը Կասպից ծովում անցկացվող զորավարժություններին անօրինական է. Իրանի ԱԳՆ

Թեհրանը Թուրքիայի և Ադրբեջանի զորավարժությունները Կասպից ծովում անօրինական է համարում:

IRNA-ի հաղորդման համաձայն՝ մամուլի ասուլիսի ժամանակ Իրանի ԱԳՆ խոսնակ Սաիդ Խաթիբզադեն ասել է. «Կասպից ծովի իրավական կարգավիճակի մասին կոնվենցիան լիովին պարզաբանել է այս հարցը: Ափամերձ հինգ պետությունները համաձայնել են, որ, այս հինգ երկրներից բացի, այլ երկրների ռազմական ներկայությունն անօրինական է»:

Նրա խոսքով՝ այդ հարցը քննարկվում է Իսլամական Հանրապետության արտաքին գործերի նախարարությունում:

Հիշեցնենք, որ Կասպից ծովի իրավական կարգավիճակի մասին կոնվենցիան ընդունվել է 2018 թվականի օգոստոսի 12 -ին: Այն ամբողջությամբ բացառում է Կասպից ծովում ոչ կասպյան պետությունների ռազմական ներկայությունը: Այս կետն ընդունվել է՝ հաշվի առնելով ՆԱՏՕ-ի ձգտումները, որի անդամ է Թուրքիան, Կասպից ծովում տեղ գրավելու համար: