Հուսով ենք, որ Ղարաբաղի հարցով եռակողմ աշխատանքային խումբը մոտ ժամանակներս կվերսկսի աշխատանքը. ՌԴ ԱԳՆ

Ռուսաստանն ակնկալում է, որ մոտ ժամանակներս Ղարաբաղի հարցով եռակողմ աշխատանքային խումբը կվերսկսի աշխատանքը: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում։

«Հարավային Կովկասում տնտեսական կապերի ապաշրջափակումը գերակա և կարևոր խնդիր է, որի իրականացման գործում շահագրգռված են տարածաշրջանի բոլոր երկրները: Այս ուղղությամբ աշխատանքները վստահվել են երեք պետությունների փոխվարչապետերին՝ եռակողմ աշխատանքային խմբի շրջանակներում: Արդյունաբերության փորձագետները կատարել են հաղորդակցության վերականգնման համար անհրաժեշտ միջոցառումների փորձագիտական վերլուծություն, ինչը թույլ է տալիս մոտ ապագայում անցնել փուլային համատեղ ենթակառուցվածքային նախագծերի իրականացմանը»,- ասել է ՌԴ ԱԳՆ պաշտոնական ներկայացուցիչը:

«Մենք ակնկալում ենք, որ եռակողմ աշխատանքային խումբը մոտ ժամանակներս կվերսկսի իր գործունեությունը: Միևնույն ժամանակ, հայ-ադրբեջանական սահմանի որոշակի տարածքներում միջադեպերը չեն նպաստում հարաբերությունների ընդհանուր ֆոնի կարգավորմանը: Մենք կողմերին կոչ ենք անում զսպված լինել, թուլացնել լարվածությունը և խաղաղ ճանապարհով լուծել հակասությունները՝ բանակցությունների միջոցով»,- եզրափակել է Զախարովան: