ԱՄՆ Կոնգրեսի անդամները Բայդենի վարչակազմից պահանջում են Ադրբեջանին զրկել ռազմական օգնությունից և դադարեցնել «907-րդ բանաձևի» կատարումից հրաժարվելու գործընթացը

Հայ դատի Ամերիկայի հանձնախմբի ջանքերով ԱՄՆ Ներկայացուցիչների պալատի տասնյակ անդամներ միացել են Դեյվիդ Վալադաոյին և Կոնգրեսի հայկական խմբի ղեկավարներին` Բայդենի վարչակազմին կոչ անելով դադարեցնել Ադրբեջանին տրվող ամերիկյան ռազմական օգնությունը, որն ուղղակիորեն և անուղղակիորեն նպաստում է Ադրբեջանի ռազմական գործողություններին և այդ երկրի ռազմական կարողականությունների բարձրացմանը:

Մայիսի 24-ով թվագրված՝ ԱՄՆ պետքարտուղար Էնթոնի Բլինքենին ուղղված նամակը ստորագրող կենգրեսականները կոչ են անում անհապաղ դադարեցնել Ալիևի կոռումպացված ռեժիմին ԱՄՆ-ի ռազմական և անվտանգային օգնության բոլոր տեսակների տրամադրումը:

Կոնգրեսականները մտահոգություն են հայտնում նախագահ Բայդենի կողմից 907-րդ բանաձևի պահանջների կատարումից հրաժարվելու կապակցությամբ։ Այդ բանաձևի պահանջներով սահմանափակվում է ԱՄՆ-ի օգնությունը Ադրբեջանին` հիմք ընդունելով Հայաստանի և Արցախի շրջափակումն ու ագրեսիան։

Նամակի հեղինակները մտահոգություն են հայտնել, որ առանց հաշվի առնելու Ադրբեջանի կողմից Հայաստանի և Արցախի շրջափակման վերացման շուրջ առաջընթացը և ագրեսիայի կիրառման փաստը՝ Պետդեպարտամենտը հրաժարվել է բանաձևի կատարումից՝  «չմանրամասնելով ազգային անվտանգության լուրջ մտահոգություններ» ասվածը, որը հիմք էր ընդունվել 907-րդ բանաձևից հրաժարման համար։

Երկկուսակցական նամակի վերաբերյալ Վալադաոն նշում է. «Ամերիկյան ոչ մի դոլար չպետք է ուղղվի Ադրբեջանի զինված ուժերին։ Նավթով հարուստ այդ երկիրը էթնիկ զտումներ է իրականացնում Արցախում, պահում է հայ ռազմագերիների  և հիմա էլ տարածքներ է բռնազավթում Հայաստանի Հանրապետությունից։ Նախագահ Բայդենը պետք է անհապաղ հետ վերցնի 907-րդ բանաձևի կատարումից հրաժարվելու՝ իր որոշումը, իսկ եթե՝ ոչ, ապա Կոնգրեսը պետք է կանոնադրապես կանխի ամերիկյան ռազմական օժանդակությունը Ալիևի ռեժիմին։ Այլընտրանքը լինելու է Բաքվի շարունակական հակահայկական ագրեսիան և այդ գործում Ադրբեջանի առաջ կանաչ լույս վառելը»։

Հայ դատի Ամերիկայի հանձնախմբի գործադիր տնօրեն Արամ Համբարյանը նշում է. «Ամերիկահայերը՝ Ֆրեզնոյից մինչև Կալիֆոռնիայի կենտրոնական հովիտներ, միանում են մեր համայնքին ու գործընկերներին ամբողջ Ամերիկայում և շնորհակալություն հայտնում կոնգրեսական Վալադաոյին և Կոնգրեսի հայկական խմբի համանախագահներին՝ Ալիևի ռեժիմին տրվող ամերիկյան ռազմական օժանդակության դադարեցման պայքարի համար։ Բաքվի կողմից սրվող ագրեսիայի պայմաններում մենք հատկապես գնահատում ենք Վալադաոյի ջանքերը, որն այցելել է Արցախ, առաջին ձեռքից ծանոթացել այնտեղ ապրող մարդկանց մարտահրավերներին և վտանգված բնակչությանը»։

Ամերիկյան կոնգրեսականների երկկուսակցական նամակի բովանդակությանը կարելի է ծանոթանալ  հետևյալ հղումով։

ՀՅԴ Բյուրոյի Հայ Դատի կենտրոնական գրասենյակ

25.05.2021 թ.