Էրդողանը առաջիկա շաբաթներին կայցելի Ադրբեջան

Կարող եմ նշել, որ այս օրերին Ադրբեջանի և Թուրքիայի նախագահների մակարդակով քննարկումներ են ընթանում, թե ինչպես պլանավորել վերականգնման աշխատանքները Ադրբեջանի «ազատագրված տարածքներում»։ Այս մասին ասել է Թուրքիայի մշակույթի և զբոսաշրջության նախարար Մեհմեդ Նուրի Էրսոյը. հաղորդում է Report.az կայքը:

Ըստ նրա՝ «Հայաստանը երկար տարիներ ոտնձգություն է կատարել Ադրբեջանի օկուպացված տարածքներում մշակութային ժառանգության նկատմամբ»։

«Այս հողերի ենթակառուցվածքային և վերակառուցման աշխատանքներին զուգահեռ, առաջին հերթին, տեղի է ունենում մշակութային և պատմական նշանակության հուշարձանների և հնագիտական հուշարձանների վերականգնում: Մոտակա շաբաթների ընթացքում Թուրքիայի նախագահ Ռեջեփ Թայիփ Էրդողանի՝ Ադրբեջան կատարած այցից հետո Ղարաբաղը վերականգնելու ուղղությամբ մեր գործողությունները կակտիվանան: Մշակույթի և պատմական հուշարձանների՝ հնարավորինս սեղմ ժամկետում վերականգնումը և պաշտպանությունը նույնպես խթան կհանդիսանան տարածաշրջանում զբոսաշրջության զարգացման համար»,– նշել է թուրք նախարարը։

Հիշեցնենք, որ դեռևս ապրիլ ամսին տեղեկություններ տարածվեցին, որ Էրդողանը նախատեսում է այցելել թշնամու կողմից օկուպացված Շուշի։