Էրդողանը անիծել է Ավստրիայի կառավարությանը

Թուրքիայի նախագահ Ռեջեփ Թայիփ Էրդողանը անիծել է Ավստրիայի կառավարությունը Իսրայելի դրոշը բարձրացնելու համար:

«Ես անիծում եմ Ավստրիայի կառավարությանը, որը Իսրայելի դրոշը կախել է կանցլերի վարչակազմի շենքի վրա: Ձեր պետության շենքի վրա ահաբեկչական պետության դրոշ բարձրացնելը նշանակում է ձեզ նույնացնել ահաբեկչության հետ»,- ասել է նա:

Իսրայելի դրոշները բարձրացվել էին կանցլերի դաշնային գրասենյակի և Ավստրիայի արտաքին գործերի նախարարության տանիքին՝ «ի նշան համերաշխության, քանի որ Իսրայելի դեմ ահաբեկչություններն արժանի են ամենախիստ դատապարտման»:

Էրդողանը մայիսի 16-ին հայտարարել էր, որ միջազգային հանրությունը պետք է «ուժեղ և զսպող դաս տա Իսրայելին»՝ Պաղեստինի հետ սրվող հակամարտության համար: Դրանից առաջ նա պաղեստինա-իսրայելական ուղղությամբ սրումը համեմատել էր Արցախի «օկուպացիայի» հետ: Էրդողանը շեշտել էր, որ Թուրքիան զայրացած է Իսրայելի «ահաբեկչական լծի» վրա, որը «հատել է բոլոր սահմանները», և խոստացել էր օգնել պաղեստինցիներին: