Թուրքիան հետ է կանչել Իսրայելի էներգետիկայի նախարարին ուղղված հրավերը

«Անադոլու» լրատվական գործակալությունը հայտնում է, որ Թուրքիան հետ է կանչել Իսրայելի էներգետիկայի նախարար Յուվալ Շտայնիցին ուղղված` հունիսին միջազգային դիվանագիտությանը նվիրված համաժողովին մասնակցելու  հրավերը:

Հոդվածում նշվում է, որ Անթալիայի նահանգում խորհրդակցության անցկացումը երկու երկրների միջև հաշտեցման առաջին քայլն էր:

Հրավերը հետ կանչելու՝ Թուրքիայի որոշումը կայացվել է «իսրայելական բանակի կողմից պաղեստինցիների նկատմամբ բռնության աճի, ներառյալ՝ Գազայի հատվածի դեմ ավիահարվածների ֆոնին»:

Գործակալությունը նշում է, որ Թուրքիայի նախագահ Ռեջեփ Թայիփ Էրդողանը շաբաթ օրը Իսրայելին անվանել է «ահաբեկչական պետություն», երբ իսրայելական ոստիկանությունն անցած ուրբաթ ռետինե փամփուշտներ և լուսաձայնային նռնակներ էր կիրառել Երուսաղեմի Ալ Աքսա մզկիթում՝ պաղեստինցիներին ցրելու համար:

Հոդվածում նշվում է, որ Շտայնիցի մասնակցությունը համաժողովին կլիներ նման բարձրաստիճան իսրայելցի պաշտոնյայի առաջին այցը Թուրքիա վերջին տարիներին: Ըստ Anadolu-ի՝ նախարարի հրավերը հետ կանչելու լուրը իսրայելցի պաշտոնյաներին հայտնել է Թել Ավիվում Թուրքիայի դեսպանությունը: