Շվեդիայի դեսպանը կանչվել է Թուրքիայի ԱԳՆ

Երեքշաբթի՝ ապրիլի 20-ին, Անկարայում Շվեդիայի դեսպան Շտեֆան Հերստրիմը կանչվել է Թուրքիայի արտգործնախարարություն, որտեղ նրան բողոք է հղվել՝ կապված թագավորության բարձրաստիճան պաշտոնյաների՝ Քուրդիստանի աշխատավորական կուսակցության ղեկավարների հետ վերջին հանդիպումների հետ: Այս մասին հայտնում են Թուրքիայի ԱԳՆ դիվանագիտական աղբյուրները:

Շվեդ դիվանագետին հայտնել են, որ Թուրքիան խստորեն դատապարտում է Շվեդիայի արտգործնախարար Էն Լինդեի հանդիպումը «ահաբեկիչների» հետ, ինչպես նաև  պաշտպանության նախարար Պիտեր Հուլթքվիստի օնլայն հանդիպումը նրանց հետ:

Տեղեկատվության համաձայն՝ թուրքական կողմը մտահոգություն է հայտնել այն փաստի կապակցությամբ, որ Շվեդիան վերջերս ընդլայնել է կապերը «անջատողականների»՝ «Սիրիայի ժողովրդավարական ուժերի» հետ:

Նշվել է, որ այն անձինք, որոնց Շվեդիայի իշխանությունների ներկայացուցիչները որպես զրուցակից են ընդունում, ՔԱԿ/PKK  անդամներ են, իսկ ՔԱԿ-ին Եվրամիությունը ներառել է ահաբեկչական կազմակերպությունների ցուցակում:

Դեսպան Հերստրիմին ասել են, որ Շվեդիայի այսպիսի վտանգավոր քաղաքականությունը ոչ միայն աջակցում է նրանց, ովքեր ցանկանում են սպառնալ Սիրիայի տարածքային ամբողջականությանը և Թուրքիայի անվտանգությանը, այլ նաև բացահայտորեն խախտում է միջազգային իրավունքը և լրջորեն վնասում Անկարայի ու Ստոկհոլմի երկկողմ հարաբերություններին: