ՀՔԾ-ն կարճել է Արթուր Վանեցյանին առնչվող երկրորդ քրեական գործը. հանցակազմ չկա. «Փաստինֆո»

ԱԱԾ նախկին տնօրեն Արթուր Վանեցյանի նկատմամբ իշխանությունների նախաձեռնած գործերը մեկը մյուսի հետեւից պայթում են։  «Փաստինֆո»-ի տեղեկություններով՝ օրերս ՀՔԾ-ում կարճվել է նրա անունը շոշափող հերթական գործը։

Հիշեցնենք՝ ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանի կողմից քաղաքական ակտիվ գործունեությամբ զբաղվելուն զուգահեռ իշխանությունները փորձեցին ինչ-որ գործեր երկնել՝ նրան մեղադրանք առաջադրելու համար։ Դրանցից մեկը վերաբերում էր ապօրինի զենք-ռազմամթերք ձեռք բերելու, պահելու արհեստածին գործին, թե, իբր, Արթուր Վանեցյանը կազմակերպված խմբի հետ ապօրինի զենք է պահել՝ ոչ ավել ոչ պակաս հենց ԱԱԾ-ում։

«Փաստինֆո»-ին հաջողվեց պարզել, որ անցած շուրջ 8 ամիսների ընթացքում ՀՔԾ-ին չի հաջողվել ոչ միայն ցուցմունք ստանալ, այլ նաեւ որեւէ ապացույց գտնել՝ Արթուր Վանեցյանին եւ ԱԱԾ-ի մյուս աշխատակիցներին՝ ապօրինի զենքի դրվագով մեղադրանք առաջադրելու համար, ուստիեւ ՀՔԾ-ին ոչինչ չի մնացել, քան որոշում կայացնել բոլորի նկատմամբ քրեական հետապնդումը դադարեցնելու, խափանման միջոցները վերացնելու եւ քրեական վարույթը կարճելու մասին՝ հանցակազմի բացակայության հիմքով։

Հիշեցնենք, որ ՀՔԾ-ում հունվարին կարճվել էր նաեւ մեկ այլ քրեական գործ, որը վերաբերում էր Ա.Վանեցյանի կողմից պաշտոնեական լիազորությունները ենթադրաբար անցնելու «դեպքին»։

ՀՔԾ-ն կրկին արձանագրել էր, որ Վանեցյանի գործողություններում բացակայում է հանցակազմը։