Պուտինը հեռախոսազրույցներ է ունեցել Փաշինյանի և Ալիևի հետ

Ռուսաստանի նախագահն այսօր հեռախոսազրույցներ է ունեցել Փաշինյանի եւ Ալիեւի հետ։ Այդ մասին հայտնում է Կրեմլի մամուլի ծառայությունը։

Համաձայն հաղորդագրության, քննարկվել են Լեռնային Ղարաբաղի վերաբերյալ համաձայնագրերի իրականացման գործնական կողմերերը, որոնք ամրագրված են 2020 թ. Նոյեմբերի 9-ի եւ 2021 թ. Հունվարի 11-ի եռակողմ հայտարարություններում:

Գոհունակությամբ նշվել է, որ հրադադարի ռեժիմը խստորեն պահպանվում է, եւ իրավիճակը տարածաշրջանում հիմնականում կայուն ու հանգիստ է:

Ըստ ռուսական կողմի, Իլհամ Ալիեւը եւ Նիկոլ Փաշինյանը բարձր են գնահատել շփման գծի եւ Լաչինի միջանցքի երկայնքով տեղակայված ռուսական խաղաղապահ զորախմբի արդյունավետ գործողությունները:

Անդրադարձ է եղել նաեւ Հարավային Կովկասում տնտեսական եւ տրանսպորտային ուղիների ապաշրջափակմանն առնչվող հարցերին: Այս համատեքստում դրականորեն նշվել է երեք երկրների փոխվարչապետերի կողմից համանախագահող աշխատանքային խմբի գործունեությունը:

Մտքերի փոխանակություն է տեղի ունեցել ռուս-ադրբեջանական եւ ռուս-հայկական համագործակցության արդիական հարցերի շուրջ:

Ի դեպ, Նիկոլ Փաշինյանի մամուլի ծառայությունը հեռախոսազրույցի մասին ոչինչ չի հաղորդում։