ԱՄՆ իշխանություններն Իսրայելին նախօրոք զգուշացրել են Իրանի հետ բանակցություններ սկսելու ծրագրերի մասին. Reuters

ԱՄՆ նախագահ Ջո Բայդենի վարչակազմը նախապես տեղեկացրել է Իսրայելին, որ նախատեսում է հայտարարել Իրանի հետ միջուկային ծրագրի շուրջ բանակցելու պատրաստակամության մասին: Այս մասին հինգշաբթի հաղորդել է Reuters գործակալությունը՝ վկայակոչելով իր աղբյուրին:

Նրա խոսքով՝ Բայդենի օգնականները չեն ցանկացել, որ Վաշինգտոնի ծրագրերի մասին լուրերը, ներառյալ՝ Իրանի դեմ պատժամիջոցները վերականգնելու պահանջը ՄԱԿ-ի Անվտանգության խորհրդից հետ կանչելու որոշումը, Իսրայելին անակնկալի բերի: Միևնույն ժամանակ, գործակալությունը նշում է, որ Բայդենը հեռախոսազրույցի ընթացքում անձամբ չի հայտնել Իսրայելի վարչապետ Բինյամին Նեթանյահուին այս տեղեկությունը, և իսրայելական կողմին այն փոխանցվել է այլ ուղիներով:

Իսրայելը նախկինում դեմ էր Իրանի հետ միջուկային գործարքին և ողջունում էր ԱՄՆ-ի դուրս գալը համաձայնագրից:

Պետդեպարտամենտի մամուլի պատասխանատու Նեդ Փրայսը հինգշաբթի ՏԱՍՍ-ին ասել էր, որ Միացյալ Նահանգները պատրաստ կլինեն մասնակցել Իրանի և 5+1 ձևաչափի այլ մասնակիցների (Ռուսաստան, Բրիտանիա, Չինաստան, Ֆրանսիա և Գերմանիա) հետ բանակցություններին Իրանի միջուկային ծրագրի շուրջ՝  Եվրամիության հրավերով։  Ըստ Reuters-ի՝ ԵՄ բարձրաստիճան ներկայացուցիչը նախապես հայտարարել էր, որ Բրյուսելը պատրաստ է հյուրընկալել հանդիպումը: