Ռուս խաղաղապահների շարժական բժշկական խմբերը բուժօգնություն են ցուցաբերել Ասկերանի շրջանում

Հատուկ նշանակության բժշկական խմբերի ռուս խաղաղապահ բժիշկները մեկ օրում օգնություն են ցուցաբերել Լեռնային Ղարաբաղի Ասկերանի շրջանի հեռավոր բնակավայրերում բնակվող ավելի քան 20 հիվանդի: Այս մասին հայտնում է ՌԴ պաշտպանության նախարարության կայքը։

Հատուկ նշանակության բժշկական ջոկատի ռուս խաղաղապահները բազմաֆունկցիոնալ բժշկական խումբ են ստեղծել՝ Լեռնային Ղարաբաղի Ասկերանի շրջանում ռազմական բժիշկների արտագնա աշխատանքն ապահովելու համար: 

Խմբերի կազմում ընդգրկված են տարբեր մասնագիտությունների բժիշկներ, ինչպես նաեւ հոգեբանական ծառայության մասնագետներ, որոնք իրենց ծառայությունն են մատուցում հեռավոր գյուղերում եւ շրջաններում ապրող բնակչությանը:

Հատուկ նշանակության բժշկական ջոկատի ստորաբաժանումների կազմում աշխատում են 60-ից ավելի բժշկական մասնագետներ, որոնց թվում են ռազմական վիրաբույժներ, անեսթեզիոլոգ-ռեանիմատոլոգներ, թերապեւտներ եւ համաճարակաբաններ:

Նշվում է, որ ավելի վաղ Հատուկ նշանակության բժշկական ջոկատի ստորաբաժանումներն Իլ-76 ռազմատրանսպորտային ավիացիայի ինքնաթիռներով Խաբարովսկ քաղաքից տեղափոխվել էին Երեւան, այնտեղից էլ՝ Ստեփանակերտ: