Իրանը կպատասխանի ցանկացած ագրեսիվ քայլի. IRNA

Նոյեմբերի 18-ին Նյու Յորքում ՄԱԿ-ում Իրանի մշտական առաքելության խոսնակ Ալի Ռեզա Միրիուսեֆին արձագանքել է New York Times-ի զեկույցին`նշելով, որ Իրանը կպատասխանի թշնամիների կողմից ցանկացած ագրեսիվ գործողության` շնորհիվ իր ռազմական կանխարգելիչ ուժի: Այս մասին հայտնում է իրանական IRNA գործակալությունը:

«Իսլամական Հանրապետության միջուկային ծրագիրը բացառապես խաղաղ և քաղաքացիական նպատակներ է հետապնդում»,- ասել է Միրիուսեֆին New York Times-ի հարցին ի պատասխան, ըստ որի՝ ԱՄՆ նախագահ Դոնալդ Թրամփը Սպիտակ տան նիստում իր ավագ խորհրդականներին հարցրել է, թե արդյո՞ք գործողություններ ձեռնարկելու տարբերակներ ունեն առաջիկա շաբաթների ընթացքում Իրանի հիմնական միջուկային օբյեկտների դեմ:

Իրանցի դիվանագետը բարձր է գնահատել Իրանի զինված ուժերի ռազմական հզորությունն ու խիզախությունը, որոնք ունակ են կանխել «ցանկացած ագրեսորի արկածախնդրություն կամ արձագանքել դրան»:

Միրիուսեֆին հաստատել է նաև, որ Ատոմային էներգիայի միջազգային գործակալությունը (ՄԱԳԱՏԷ) ստուգել է Իրանի միջուկային գործունեությունը և մի քանի զեկույցներում նշել դրանց խաղաղ բնույթը: