ԱՄՆ-ի և Ֆրանսիայի ներկայացուցիչները Մոսկվայում կքննարկեն Արցախի հարցը

Ֆրանսիայի և ԱՄՆ-ի պատվիրակությունները կժամանեն Մոսկվա՝ քննարկելու Լեռնային Ղարաբաղում հակամարտ կողմերի հաշտեցման ծրագիրը: Այս մասին հայտարարել է ՌԴ ԱԳ նախարար Սերգեյ Լավրովը RT հեռուստաալիքով հեռարձակված մամուլի ասուլիսում:

«Մենք ոչ մի կերպ չենք ցանկանում հեռու մնալ ամերիկացի և ֆրանսիացի մեր գործընկերներից: Ավելին՝ մենք նրանց հրավիրեցինք Մոսկվա, նրանք առաջիկա օրերին կլինեն այստեղ`մանրամասն քննարկելու, թե ինչպես կարող են նպաստել ձեռք բերված պայմանավորվածությունների իրականացմանը»,- ասել է Լավրովը:

Նա նշել է, որ ՄԱԿ-ի կազմակերպությունները, առաջին հերթին`ՅՈՒՆԵՍԿՕ-ն, կարող են նպաստել տարածաշրջանում խաղաղությանն ու անվտանգությանը: Բացի այդ՝ Լավրովն ընդգծել է, որ այս ոլորտում ռուսական նախաձեռնությունները համահունչ են ԵԱՀԿ Մինսկի խմբի համանախագահների կողմից առաջ քաշված նախաձեռնություններին։