Rolling Stone ամսագիրն անդրադարձել է SOAD-ի` Արցախյան գոյապայքարին նվիրված նոր երգերին

Հեղինակավոր Rolling Stone ամսագիրը ծավալուն հոդված է հրապարակել System of a Down ռոք խմբի երկու նոր երգերի մասին, որոնք նվիրված են Արցախյան գոյապայքարին:

Ամսագիրը նշում է, որ «Protect The Land» և «Genocidal Humanoidz» երգերը խմբի համար առաջինն են 15 տարվա երկար դադարից հետո:

«Տեսնելով, որ Ադրբեջանը սեպտեմբեր ամսին պատերազմ է սկսել Հայաստանի նկատմամբ` հայկական արմատներ ունեցող երաժիշտները վերադարձել են ստուդիա, որպեսզի երկու նոր երգեր ձայնագրեն և դրանով ուշադրություն հրավիրեն իրենց պատմական հայրենիքում ընթացող իրադարձություններին»,- նշում է Rolling Stone-ը:

Հոդվածում Rolling Stone-ը, անդրադառնալով Լեռնային Ղարաբաղին, նշում է, որ այնտեղ մեծ մասամբ բնակվում են էթնիկ հայեր և իրենց հայրենիքն անվանում են Արցախ:

«Դա լեռնային բնակավայր է և ունի երկար, արյունալի պատմություն, որը սպի է թողել այնտեղ ապրող մարդկանց հոգիների վրա: Հայաստանի և Ադրբեջանի միջև վերջին պատերազմն ավարտվել է 1994թ., որի արդյունքում հաստատվել է հրադադար, իսկ տարածքն անցել է հայկական կողմի վերահսկողության տակ: Սեպտեմբերին Ադրբեջանը նոր պատերազմ է սկսել»,- գրված է հոդվածում:

Նշվում է նաև, որ Ադրբեջանը պատերազմի ընթացքում բազմաթիվ պատերազմական հանցագործություններ է իրականացրել և աջակցություն ստացել 1915թ. Հայոց ցեղասպանությունն իրականացրած Թուրքիայի կողմից:

Խմբի անդամները նշում են, որ իրենք զինվորներ չեն, սակայն երաժշտության միջոցով են փորձում մղել իրենց բաժին գոյության պայքարը: