Ադրբեջանական զենքերը մարդկայնության արժեքներից դուրս են. Մուրադյանը` տուժածների վնասվածքների մասին

Աշխարհի բոլոր բժիշկները պարտավոր են իրենց վրդովմունքի և բողոքի ձայնը բարձրացնել հակառակորդի կողմից համաճարակի շրջանում պատերազմ հրահրելը և ագրեսորին կոչ անել կանգ առնել: Այս մասին մամուլի ասուլիսի ժամանակ ասաց Երևանի պետական բժշկական համալսարանի ռեկտոր Արմեն Մուրադյանը:

«Այն զենքերը, որոնք կիրառում են և այն վնասվածքները, որոնք տեսնում ենք ուղղակի բոլոր մարդասիրական, համամարդկային արժեքներից դուրս են՝ հաշվի առնելով նրանց բնույթը, հաշվի առնելով նրանց վտանգավոր էությունը: Այսպիսով կարող ենք ասել, որ այդ զենքերի կիրառումը անմարդկային բնույթ է կրում: Առավել ևս մի պահի, որ մենք բոլորս աշխարհում փաստացի համախմբված ենք այլ արհավիրքի՝ կորոնավիրուսի դեմ պայքարում»,- ասաց Մուրադյանը:

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, ինչի հետևանքով Արցախի տարբեր շրջաններում զոհվել են քաղաքացիական անձինք: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները, որի արդյունքում Վարդենիսի շրջանում սպանվել է 1 քաղաքացիական անձ և այրվել է քաղաքացիական ավտոբուս` Ադրբեջանի ԶՈՒ-ին պատկանող ԱԹՍ-ի հարվածից:

Հայտնաբերվել են փաստեր՝ Թուրքիայի ներգրավվածության վերաբերյալ: Սեպտեմբերի Թուրքիայի F-16 կործանիչը ՀՀ օդային տարածքում խոցել է հայկական ռազմաօդային ուժերի ՍՈւ-25 գրոհիչը, զոհվել է օդաչուն: Հոկտեմբերի 1-ին հակառակորդը հրետանի էր կիրառել Գեղարքունիքի մարզի Շատվան գյուղի ուղղությամբ, ինչպես նաև հարվածային ԱԹՍ-ից հրթիռ էր արձակել Մեծ Մասրիկ բնակավայրի վրա, ինչի հետևանքով զոհվել էր մեկ քաղաքացիական անձ, երկու քաղաքացիական անձ ստացել էր տարբեր աստիճանի վիրավորվում։