Պետդուման հավանական է հանդես գա հայտարարությամբ՝ Արցախում իրավիճակի սրման առնչությամբ

ՌԴ Պետդուման կարող է հանդես գալ հայտարարությամբ՝ կապված Արցախում իրավիճակի սրման հետ: Այս մասին ՏԱՍՍ-ին հայտնել է ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահ Լեոնիդ Կալաշնիկովը:

Նա, մասնավորապես, նշել է. «Այո, ծրագրվում է»:

Կաշանիկովը հավելել է, որ տեքստը կարող է պատրաստ լինել վաղը կամ մյուս օրը:

Իր հերթին,  կոմիտեի ղեկավարի տեղակալ Վիկտոր Վոդոլացկին մանրամասնել է, որ խոսքը Հայաստանի ու Ադրբեջանի խորհրդարաններին ուղղված հայտարարությունների մասին է, և օրվա վերջում որոշում կընդունվի:

«Ընդհանուր առմամբ, կոչ կարվի դադարեցնել ռազմական գործողությունները, նստել բանակցային սեղանի շուրջը, այդ թվում՝ ռուսական կողմի մասնակցությամբ: Մենք՝ խորհրդարանականներս, մեր կողմից պատրաստ ենք այդ ալգորիթմը մշակել պրոֆիլային կոմիտեների հետ»,- մանրամասնել է նա ու ավելացրել՝ ՌԴ-ն բարիդրացիական հարաբերություններ է պահպանում թե՛ Հայաստանի, թե՛ Ադրբեջանի հետ: