Եգիպտոսի խորհրդարանը հավանության է արժանացրել Լիբիա զորք ուղարկելու օրինագիծը. հնարավոր է թուրք-եգիպտական բախում

Երկուշաբթի Եգիպտոսի խորհրդարանը միաձայն հաստատել է երկրի զորքերի հնարավոր ուղարկումը Եգիպտոսից դուրս մարտական առաքելություն իրականացնելու համար.  հայտնում է երկրի պետական հեռուստատեսությունը:

Նիստին մասնակցում էին 510 պատգամավոր:

«Խորհրդարանը միաձայն հաստատել է Եգիպտոսի զինված ուժերի գործուղումը՝ երկրի սահմաններից դուրս մարտական առաքելություններ իրականացնելու համար՝ պաշտպանելու ազգային անվտանգությունը՝ ռազմավարական արևմտյան ուղղությամբ զինված հանցավոր խմբավորումների և օտարերկրյա ահաբեկիչների դեմ», - հայտնում է պետական հեռուստատեսությունը:

«Պատմական հանդիպման ընթացքում խորհրդարանը քննարկել է Եգիպտոսի Անվտանգության խորհրդի նիստի արդյունքները, որը տեղի է ունեցել կիրակի նախագահ (Աբդել Ֆաթթահ) ալ-Սիսիի գլխավորությամբ», - ասվում է հեռուստաալիքի մեջ:

Խնդիրը քննարկվել է փակ դռների հետևում կայացած հանդիպման ընթացքում՝ առանց մամուլի ներկայության: Դահլիճում էր Եգիպտոսի պաշտպանության փոխնախարար Մամդուհ Շահինը:

Եգիպտոսի սահմանադրության համաձայն՝ երկրի ղեկավարը կարող է պատերազմ հայտարարել կամ ուղարկել Եգիպտոսի զորքեր՝ մարտական առաքելություն իրականացնելու համար երկրի սահմաններից դուրս՝ խորհրդարանի համաձայնությունը ստանալուց հետո:

Եգիպտոսի խորհրդարանի Արաբական հարցերով հանձնաժողովի ղեկավարի տեղակալ Ահմադ Իմբաբին ավելի վաղ հայտնել էր, որ խորհրդարանը նախատեսում է քննարկել կիրակի կամ երկուշաբթի Եգիպտոսի զորքերի հնարավոր ուղարկումը Լիբիա: Նա ակնկալում է, որ այդ որոշման օգտին կքվեարկի պատգամավորների մեծամասնությունը:

Եգիպտոսի նախագահ Աբդել Ֆաթթահ էլ-Սիսին հինգշաբթի օրը Կահիրեում հանդիպել է լիբիական ցեղերի շեյխերի և երեցների հետ: Հանդիպումը տեղի է ունեցել «Եգիպտոս և Լիբիա. Մեկ ժողովուրդ և մեկ ճակատագիր» խորագրով գիտաժողովի շրջանակներում: Համաժողովի ընթացքում Լիբիայի ցեղերի ներկայացուցիչները հաստատեցին Եգիպտոս կոչը՝ աջակցելու լիբիական բանակին և ցեղերին ազատագրելու երկիրը:

Հունիսի վերջին Ալ-Սիսին հայտարարել էր, որ իր երկիրը պատրաստ է օժանդակել լիբիական ցեղերին արտաքին միջամտության դեմ պայքարում՝ պատրաստելով և զինելով նրանց: Նախագահը նաև նշել է, որ Եգիպտոսի ցանկացած ուղղակի միջամտություն Լիբիայում այժմ ունի օրինականություն՝ համաձայն միջազգային օրենսդրության: Նրա խոսքով՝ զորքերի առաջխաղացման համար «կարմիր գիծը» Սիրթ քաղաքն է, որը գտնվում է Եգիպտոսի հետ սահմանից մոտ 900 կմ հեռավորության վրա, և Ջուֆրա նահանգը:

Անցյալ շաբաթ Եգիպտոսը Լիբիայի հետ սահմանին անցկացրել էր լայնամասշտաբ զորավարժություն՝ «Վճռականություն 2020» անունով, որին մասնակցում էին Եգիպտոսի զինված ուժերի բոլոր տեսակի ստորաբաժանումները:

Լիբիայում առճակատումը շարունակվում է Ֆայեզ Սարաջի Ազգային համաձայնության կառավարության, որը վերահսկում է Տրիպոլին և երկրի արևմուտքում գտնվող տարածքները, և Մարշալ Խալիֆա Հաֆթարի հրամանատարության ներքո Լիբիայի ազգային բանակի միջև, որը համագործակցում է արևելքում գտնվող խորհրդարանի հետ նստած: Սարաջին աջակցում է Թուրքիան, իսկ Հաֆթարի Եգիպտոսը, ինչպես նաև անուղղակիորեն Ռուսաստանը:

Նշենք, որ Թուրքիան ուղղակիորեն աջակցում է Ֆայեզ Սարաջին, այնտեղ ունի երկու ռազմակայան։ Ե՛վ Թուրքիան, և՛ Եգիպտոսը սեփական շահերն են հետապնդում Լիբիայում (Թուրքիան տնտեսական և քաղաքական դիրքերը ամրապնդելու, իսկ Եգիպտոսը սեփական սահմաններն ավելի անտանգ դարձնելու ուղղությամբ) և եթե Եգիպտոսը զորք մտցնի Լիբիա, ապա հավանական է երկու երկների անմիջական բախում՝ Սիրթի և Ջուֆրայի համար։