Հռոմի Պապը Հայաստանին եւ Ադրբեջանին երկխոսության կոչ է արել

Հռոմի Պապ Ֆրանցիսկոսը երկխոսության միջոցով կոչ է արել հասնել Հայաստանի եւ Ադրբեջանի միջեւ առկա խնդիրների խաղաղ կարգավորմանը. «ՌԻԱ-նովոստի»-ի փոխանցմամբ՝ հայտնում է Yerkir.am-ը:

«Մտահոգությամբ հետեւում եմ վերջին օրերին Կովկասի տարածաշրջանում, Հայաստանի եւ Ադրբեջանի միջեւ զինված լարվածության սրմանը»- հայտարարել Է քահանայապետը՝ ավանդական կիրակնօրյա քարոզի ժամանակ, դիմելով Վատիկանի Սուրբ Պետրոսի հրապարակում հավաքված հավատացյալներին:

Ֆրանցիսկոս պապը խոստացել է աղոթել տեղի ունեցած բախումների հետեւանքով զոհվածների ընտանիքների համար եւ հույս է հայտնել, որ միջազգային հանրության աջակցությամբ կողմերի երկխոսության եւ բարի կամքի միջոցով հնարավոր կլինի հասնել երկարատեւ խաղաղ լուծման՝ ի բարօրություն այդ ժողովրդների։