Վահրամ Բալայանի մեկնաբանությունը Տավուշի ողղությամբ սադրանքի վերաբերյալ

«Ապառաժ»-ի խնդրանքով ԱՀ Ազգային Ժողովի Արտաքին հարաբերությունների հանձնաժողովի նախագահ Վահրամ Բալայանը մեկնաբանել է ՀՀ Տավուշի մարզում Ադրբեջանի ձեռնարկած սադրանքը.

«Հուլիսի 12-ին և 13-ին Ադրբեջանի զինված ուժերի կողմից ՀՀ Տավուշի մարզում սահմանային դիրք գրավելու, ինչպես նաև վերջին շրջանում Նախիջևանը գերռազմականացված գոտի դարձնելու փորձերը վկայում են, որ հարևան հանրապետությունը ամեն կերպ ձգտում է Հայաստանի Հանրապետությանը ներքաշել լայնածավալ ռազամական գործողությունների մեջ:

Կարծում ենք, որ այս դատապարտելի սադրիչ քայլերը ԵԱՀԿ Մինսկի խմբի համանախագահների կողմից պետք է համարժեք արձագանքի արժանանան:

Միաժամանակ գտնում ենք, որ ՀԱՊԿ-ը, որպես տվյալ կառույցի անդամ երկրների անվտանգության երաշխավոր, պարտավոր է գործող կանոնադրության համապատասխան քայլեր ձեռնարկել:

Այնուհանդերձ վստահ ենք, որ Հայաստանի Հանրապետության և Արցախի Հանրապետության սահմանների միակ հուսալի պաշտպան Հայոց բանակը ջախջախիչ հարվածներով ինչպես միշտ, այս անգամ էլ կպաշտպանի հայրենի երկրի անդորրը»: