Թուրքիան Ֆրանսիայից պահանջել է ներողություն խնդրել

Թուրքիայի արտգործնախարար Մևլյութ Չավուշօղլուն Ֆրանսիայից պահանջել է ներողություն՝ Միջերկրական ծովում ֆրանսիական նավի դեմ սադրանք իրականացնելու մեջ մեղադրելու համար:

«Սա անհիմն հայտարարություն է: Ֆրանսիան պետք է ներողություն խնդրի Թուրքիայից», - հայտարարարել է թուրք նախարարը՝ գերմանացի գործընկերոջ՝ Հայկո Մաասի հետ հանդիպման ժամանակ։

Միևնույն ժամանակ, Չավուշօղլուն շեշտել է, որ Թուրքիան պատրաստ է աշխատել բոլոր երկրների հետ, ներառյալ Ֆրանսիայի, Լիբիայում հրադադար հաստատելու համար՝ մեղադրելով Լիբիայի ազգային բանակի հրամանատար Հալիֆա Հաֆթարին՝ հակամարտության խաղաղ կարգավորումը չընդունելու մեջ:

Հիշեցնենք, որ հունիսի 10-ին ֆրանսիական նավը փորձել էր խուզարկություն իրականացնել Լիբիա ուղևորվող թուրքական նավում՝ Լիբիա զենք տեղափոխելու կասկածանքով, սակայն թուրքական նավին ուղեկցող թուրքական ռազմանավերը հրթիռներն ուղղել են ֆրանսիական նավի ուղղությամբ։