Խախտելով Սահմանադրությունը՝ վարչապետը չի կարող երկիրը տանել ժողովրդավարության․ սփյուռքում մտահոգությամբ ենք հետևում Հայաստանում տեղի ունեցող իրադարձություններին. Մուրադ Փափազյան

Բոլորս էլ պետք է իմանանք, որ ժողովրդավարության այբուբենը հարգանքն է Սահմանադրության նկատմամբ, պետք է հարգել Սահմանադրությունը, եթե ցանկանում ենք երկիրը տանել դեպի ժողովրդավարություն: Այս մասին Tert.am-ի հետ զրույցում ասաց Ֆրանսիայի հայկական ընկերությունները համակարգող խորհրդի համանախագահ, Դաշնակցության բյուրոյի անդամ Մուրադ Փափազյանը՝ անդրադառնալով վերջին շրջանում Սահմանադրական դատարանի շուրջ տեղի ունեցող զարգացումներին:

«Կարելի է հասկանալ, որ իշխանությունները ցանկանում են փոփոխություններ անել Սահմանադրությունում: Եթե որևէ իշխանություն կարծում է, որ կարիքը կա Սահմանադրությունում որոշ կետեր փոխելու, իր իրավունքն է, դա բնական է, բայց կան պայմաններ, որոնք ևս պետք է ընդունի»,- ասաց նա՝ նկատելով, որ այսօր այդ պայմանները չեն հարգվում, և Սահմանադրության փոփոխությունները ճիշտ ձևով տեղի չեն ունենում․ «Կա կարգ, կա օրենք, և պետք է այդ օրենքներն այս իշխանությունները հարգեն, որպեսզի փոփոխություններն ընդունելի լինեն ոչ միայն մեր ժողովրդի, այլ նաև՝ միջազգային հանրության կողմից»:

Մուրադ Փափազյանի խոսքով՝ շատ կարևոր է միջազգային հանրության կարծիքն այսօր Հայաստանում տեղի ունեցողի վերաբերյալ, որովհետև այն միջազգային ընտանիքի մաս է կազմում: «Եթե իշխանությունները խախտեն ընդհանուր ժողովրդավարական այբուբենը Սահմանադրության միջոցով՝ չհարգելով այն՝ միջազգային ընտանիքը վատ կեցվածք կընդունի Հայաստանի նկատմամբ: Հակասահմանադրական քայլերը չեն կարող նպաստ բերել Հայաստանին»,- ասաց նա:

Նրա նկատառմամբ՝ ՀՀ վարչապետ Նիկոլ Փաշինյանը շատ լավ գիտի այդ ամենը, քանի որ վերջին տարիներին մի քանի անգամ է փոխվել Սահմանադրությունը: «Պետք է հարգի կարգը, նույնիսկ եթե դժվարություններ ունենա, որովհետև հասկանալի է, որ 20 տարի է, որ երկիրը ղեկավարվում էր մի ուժի կողմից, և երբ ինքը եկավ իշխանության, չէր կարող մեկ վայրկյանում փոխել Սահմանադրությունը»,- ասաց նա:

Նյութն ամբողջությամբ՝ սկզբնաղբյուր կայքում: