Ավել ժամանակ չունենք ուղղակի խոսելու եւ քննադատելու համար, պետք է լծվենք աշխատանքի. բժիշկի կոչը

Որոշ ժամանակով թողեք քաղաքական ենթատեքստեր կրող ելույթները, զերծ մնացեք քաղաքական բնորոշումներից եւ արտահայտություններից՝ անկախ նրանից թե ով է սխալվել, ում է ինչ ձեռնտու, ով է ինչի տակ թաքնված, ով է անմեղ կամ մեղավոր, ում կողմից է ղեկավարվում կամ չի ղեկավարվում այս ամենը: Այս մասին հայտարարություն է տարածել Կապան ԲԿ-ի Մանկական բաժնի վարիչ բժիշկ Արարատ Հարությունյանը եւ կոչ արել մյուս բժիշկներին միանալ իր կոչին:

Նա, մասնավորապես, նշել է. «Ես չեմ խոսում քննադատելու, նախատելու, գովաբանելու կամ պարզապես խոսալու համար: Եվ ես ոչ թե խնդրում, այլ պարզապես պահանջում եւ կոչ եմ անում ՀՀ-ի բոլոր քաղաքական ուժերին, լինեն նրանք խորհրդարանական, թե արտախորհրդարանական, բոլոր քաղաքացիական եւ հասարակական կառույցներին եւ ինստիտուտներին, որոնք ունեն այսօր որեւէ քաղաքական ուղղվածություն եւ որոշակի շահեր են հետապնդում, անհատներին, բոլոր բոլորին:

Որոշ ժամանակով թողեք քաղաքական ենթատեքստեր կրող ելույթները, զերծ մնացեք քաղաքական բնորոշումներից եւ արտահայտություններից՝ անկախ նրանից թե ով է սխալվել, ում է ինչ ձեռնտու, ով է ինչի տակ թաքնված, ով է անմեղ կամ մեղավոր, ում կողմից է ղեկավարվում կամ չի ղեկավարվում այս ամենը:

Սրանք իհարկե բավականին կարեւոր հարցեր են, բայց որպես բժիշկ հավատացնում եմ՝ ոչ հիմա, ոչ մեր ժողովրդի համար այս ծանրագույն իրավիճակում: Ինչպես բոլորս միակարծիք ու միանպատակ ենք, երբ ժողովրդի ասած «Դանակը ոսկորին է հասնում», այս անգամ մի քիչ շուտ համախմբվենք եւ թույլ չտանք դանակին հասնել ոսկորին: Օգնեք մեզ՝ բժիշկներիս, անխոչընդոտ կատարել մեր աշխատանքը, իսկ ձեր քաղաքական վերլուծությունների համար դեռ շատ ժամանակ կունենաք: Ես կոչով դիմում եմ բոլոր բժիշկներին, որպեսզի նրանք նման պահանջով եւս հանդես գան: Այս պահին մենք ավել ժամանակ չունենք ուղղակի խոսելու եւ քննադատելու համար, մենք պետք է լծվենք աշխատանքի, մենք պետք է միասին հաղթահարենք այս վիրուսը՝ անկախ կուսակցական պատկանելիությունից եւ ընտրած գաղափարախոսությունից: