Երեք անչափահասներ բնակարանային գողություններ են կատարել․ Գավառի ոստիկանների բացահայտումը

Մայիսի 20-ի երեկոյան ոստիկանության Գավառի բաժնում մի կին հաղորդում էր տվել, որ մայիսի 10-ից 20-ն ընկած ժամանակահատվածում Գավառ քաղաքի Պռոշյան փողոցի իրենց առանձնատնից գողություն է կատարվել:

Պարզվել է՝ օգտվելով տանտերերի բացակայությունից, կոտրել էին պատշգամբի դռան ապակիները, մտել տուն, սենյակները տակնուվրա անելուց հետո գողացել էին ոգելից խմիչք ու հեռացել: Դեպքի առթիվ հարուցվել է քրեական գործ:

Գաղտնի հափշտակությունը կատարել են Գավառի Իսահակյան, Նալբանդյան, Ազատության փողոցների երեք անչափահաս բնակիչներ: Բացատրական աշխատանքի արդյունքում մայիսի 21-ին կասկածվողները ներկայացել են ոստիկանության Գավառի բաժին և ոչ միայն խոստովանել են կատարածը, այլև ներկայացրել են գողոնի մի մասը:

Հետագա միջոցառումներով պարզվել է նաև, որ մայիսի սկզբին նրանք ննջասենյակի պատուհանից մտել էին Պռոշյան փողոցի տներից մեկը, գողացել արհեստագործական գործիքներ, ջրի պոմպ, կենցաղային իրեր ու խմիչք: Օրեր անց դարձյալ պատուհանից մտել էին Նալբանդյան փողոցի մի տուն, էլեկտրական շարժիչ և կենցաղային իրեր հափշտակել:

Տուժողներից ընդունվել է հաղորդում: Հանգամանքները պարզվում են:

Հարուցված քրեական գործի նախաքննությունը շարունակվում է: