Մենք ենք գնում դիմակներ և ձեռնոցներ. հասարակական տրանսպորտի վարորդները՝ սահմանափակումների մասին

Մայիսի 18-ից հանրապետությունում վերսկսվեց հասարակական տրանսպորտի աշխատանքը։  Չնայած պարետատունը թույլատրել է աշխատել, այնուամենայնիվ, սահմանված կանոններ կան, որոնց խստորեն հետևելը պարտադիր է։ Ոստիկանությունը վերահսկողություն է իրականացնում՝ տրանսպորտ բարձրանալ կարելի է միայն դիմակ և ձեռնոց կրելու պարագայում, մեքենաներում պարտադիր է ախտահանիչ նյութերի առկայությունը, վարորդները նույնպես պիտի կրեն դիմակ և ձեռնոց, բացառեն կանգնած ուղևորների տեղափոխումը։

Yerkir.am-ը շրջեց Երևանի փողոցներում՝ տեսնելու համար, թե որքանով է փոխվել երևանցիների կյանքը սահմանափակումների այս փուլում։ Պարզվում է՝ շուրջ երկու ամիս հարկադիր և չվճարվող պարապուրդի մատնված վարորդներն այսօր ևս խնդիրներ ունեն՝ անհրաժեշտ է օրական մի քանի դիմակ և ձեռնոց գնել, քանի որ կամ չեն հատկացնում, կամ հատկացրածը չի հերիքում ամբողջ օրվան (մի քանի ժամը մեկ դիմակը փոխելը պարտադիր է): 

Վարորդներից մեկը մեզ հետ զրույցում նշեց, որ ուղևորների քանակը մոտ 80 տոկսով նվազել է։

«Օրական երկու անգամ դիմակ և ձեռնոց ենք գնում, սպասարկող ընկերությունն այդքան ձեռնոց ու դիմակ բոլորին այդ քանակով տալ չի կարող, մենք աշխատում ենք, գոնե 500 դրամ դնում մի կողմ՝ որ դիմակ ու ձեռնոց գնենք»-, նշեց նա։

 Մեկ այլ վարորդ էլ  ասաց, որ իրենց ձեռնոց և դիմակ տրամադրում են, սակայն դա չի բավականացնում, ստիպված են լինում իրենք ևս գնել։

Նշենք, որ հասարակական տրասպորտի ամբողջական գործարկվելու որոշումը կայացվել էր դեռևս մայիսի 14-ին, երբ ԱԺ-ն արտահերթ նիստում ընդունեց արտակարգ դրությունը երակարաձգելու որոշումը։ 

Հիշեցնենք, որ, ըստ ՀՀ պարետի որոշման, կանոնավոր և ոչ կանոնավոր ուղևորափոխադրումներ իրականացնող կազմակերպությունը  նշանակում է կորոնավիրուսային հիվանդության տարածման կանխարգելման միջոցառումների պատասխանատու որն ապահովում է`

• սանիտարահամաճարակային անվտանգության կանոնների և հիգիենայի նորմերի պահպանման նկատմամբ պատշաճ հսկողությունը և կանոնների համար անհրաժեշտ պարագաների, նյութերի ու հարմարությունների առկայությունը,
• առնվազն ախտահանումների և աշխատողների առողջական վիճակի մասին գրանցումների (այլ գրանցումներն` ըստ նպատակահարմարության) վարումը համապատասխան գրանցամատյանում:

Մանրամասները՝ տեսանյութում.