Իրաքում կորոնավիրուսի տարածումը կանխելու նպատակով 8 օրյա պարետային ռեժիմ է սահմանվել

Իրաքում որոշում է կայացվել ութ օր ժամկետով շուրջօրյա պարետային ժամ հայտարարելու մասին նոր կորոնավիրուսի համավարակի պատճառով, հաղորդում է ՏԱՍՍ-ը՝ հղում անելով Al Arabiya հեռուստաալիքին։

Հեռուստակայանի տեղեկատվությամբ՝ ինքնամեկուսացման շուրջօրյա ռեժիմը կսկսվի ուրբաթ՝ մայիսի 22-ին, եւ կտեւի մինչեւ մայիսի 30-ը։ Մահմեդականների համար սուրբ ամիս Ռամադանի ավարտը խորհրդանշող Ուրազ-բայրամ եռօրյա տոնը իրաքցիները նույնպես կանցկացնեն ինքնամեկուսացման մեջ։ Մերձավոր Արեւելքի երկրների մեծամասնությունում Ռամադանը կավարտվի մայիսի 24-ին։

Ըստ ավանդույթի՝ այդ տոնին, որը համարվում է իսլամական օրացույցի կարեւորագույն օրերից մեկը, մարդիկ այցելում են բարեկամներին եւ ընկերներին, մեկնում են քաղաքից դուրս, հավաքվում են այգիներում եւ հանգստի այլ վայրերում։

Ներկայում Իրաքում հայտնաբերվել է նոր կորոնավիրուսով վարակման 3 260  դեպք, մահացել է 121, առողջացել՝ 2 126 մարդ։

Նոր կորոնավիրուսի հիվանդության բռնկումը գրանցվել է 2019 թվականի դեկտեմբերին Կենտրոնական Չինաստանում։ Մարտի 11-ին Առողջապահության համաշխարհային կազմակերպությունը ճանաչել է այն որպես համավարակ։ Համավարակ հայտարարելու սկզբից առ այսօր աշխարհում վարակվել է ավելի քան 4,4, մլն մարդ, ավելի քան 300 հազարը մահացել է։