Ազգային գրադարանում արխիվացված նյութերի կորուստ տեղի չի ունեցել․ ՀԱԳ

Բոլոր տարիներին թվայնացված և արխիվացված նյութերը պահպանված են նաև առանձին կրիչներով,  հետևապես այդ առումով արխիվացված նյութերի կորուստ տեղի չի ունեցել՝ Yerkir.am-ին հայտնեցին Հայաստանի ազգային գրադարանից՝ մեկնաբանելով լրատվամիջոցներից մեկի հրապարակումը, թե Ազգային գրադարանի թվայնացված արխիվը ոչնչացել է հրդեհի հետևանքով։

Գրադարանից հերքեցին արխիվի ոչնչանալու լուրը՝ պարզաբանելով, որ սերվերային սարքերի տեխնիկական վիճակը, գրադարանի մասնագետի կողմից դրանց արտաքին տեսքի գնահատմամբ, հուսադրող է, սակայն լիարժեք գնահատական հնարավոր կլինի տալ դրանք ստուգելուց հետո, ինչը հնարավոր կլինի ԱԻՆ-ի կողմից դեպքի քննության և դրա վերաբերյալ արձանագրության տրամադրումից հետո:

Այժմ գրադարանը քայլեր է նախաձեռնում ամբողջ աշխատանքային բազան՝ թվայնացված ողջ նյութը, ամպային համակարգ տեղափոխելու և այն կրկին ընթերցող հանրությանը հասանելի դարձնելու ուղղությամբ:

Գրադարանից տեղեկացրին, որ արտակարգ դրության պայմաններում Հայաստանի ազգային գրադարանն աշխատել է միայն առցանց, իսկ սերվերները կարգավորվել են հեռավար կերպով:

Մայիսի 10-ին ինտերնետ կապի խափանման և ՀԱԳ էլեկտրոնային շտեմարանների առցանց անհասանելիության պատճառները պարզելու նպատակով ՀԱԳ աշխատակիցները շենքի պահպանությունն իրականացնող ոստիկաններից մեկի ուղեկցությամբ որոշ էլեկտրական սարքեր հայտնաբերել են ծխեցված վիճակում:

Այնուհետև ժամանել է նաև շենքում ծառայություն իրականացնող ԱԻՆ աշխատակիցը:

Գրադարանի տնօրինությունը տեղի ունեցածի բնույթը և հանգամանքները պարզելու նպատակով անմիջապես դիմում է ներկայացրել ԱԻՆ նախարարին, սակայն համապատասխան մասնագետներ դեռ չեն ժամանել գրադարան դեպքի հանգամանքները պարզելու:

Քանի որ շենքի պահպանությունն իրականացնող ոստիկանները և ՀԱԳ անվտանգության աշխատակիցը նշեցին, որ հոսանքի տատատումներ և անջատում է եղել, տնօրինությունը դիմում է ուղարկել նաև ՀԵՑ տնօրենին, պլանային և կանխարգելիչ անջատումների ու հոսանքի տատանումների վերաբերյալ տեղեկություն տրամադրելու խնդրանքով, որին դեռևս պատասխան չի տրվել:

Նշենք, որ սերվերներում հայերեն գրքերի, պարբերական մամուլի թվային տարբերակներն էին,  Հայաստանի գրադարանների  համահավաք գրացուցակը և այլ թվայնացված նյութեր: Սերվերների վրա պահվում էին ազգային արժեքների թվային տարբերակները, բարեբախտաբար, արժեքները նույնպես անվնաս են: