Իրանը խնդրել է չեղարկել ամերիկյան պատժամիջոցները, որպեսզի կարողանա պայքարել կորոնավիրուսի դեմ

Իրանի արտգործնախարար Մոհամմադ Ջավադ Զարիֆը հայտարարություն է տարածել առ այն, որ կորոնավիրուսի դեմ պայքարելու համար անհրաժեշտ է, որ ԱՄՆ-ի պատժամիջոցները չեղարկվեն. գրում է Gazetta-ն՝  Իրանի արտգործնախարարության պաշտոնական ներկայացուցիչ Աբբաս Մուսավիի խոսքրերին հղումով. հայտնում է Yerkir.am-ը:

Նշվում է՝ Զարիֆը նամակ է ուղարկել ՄԱԿ-ի գլխավոր քարտուղարին՝ խնդրելով չեղարկել Իրանի դեմ ԱՄՆ-ի բոլոր միակողմանի պատժամիջոցները, որպեսզի Իրանը կարողանա պայքարել կորոնավիրուսի դեմ:

Հավելվում է՝ նամակի կրկնօրինակներն ուղարկվել են միջազգային կազմակերպությունների ղեկավարներին ու տարբեր երկրների արտգործնախարարներին:

Վերջին տվյալներով՝ Իրանում կորոնավիրուսի վարակակիրների թիվը հասել է 10.075-ի, ապաքինվածների թիվը՝ 2959-ի, մահացածներինը՝ 429-ի:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին:

Մարտի 12-ի ժամը 10.13-ի դրությամբ ողջ աշխարհում հաստատվել է կորոնավիրուսով վարակման 126.254 դեպք, որից 4.637-ը՝ մահվան, և 68.266-ը՝ առողջացման:

Հիշեցնենք՝ Եվրոպայում ավելի քան 9000 հայտաբերված վարակակիր կա, որից 2/3-ը բաժին է ընկնում Իտալիային, վարակման ավելի քան 700-ական դեպքեր են գրանցվել Ֆրանսիայում և Գերմանիայում։ Առաջին անգամ կորոնավիրուս է հայտնաբերվել նաև Մոլդովայում։

Հայաստանում այս պահին կորոնավիրուսի հաստատված 4 դեպք կա. առաջին պացիենտը, ում մոտ հայտնաբերվել էր կորոնավիրուս, 29 տարեկան է եւ ժամանել է Իրանից։ Նա իրեն լավ է զգում եւ ոչ մի գանգատ չունի։ Կրկնակի թեստավորումից հետո նրան կարող են դուրս գրել հիվանդանոցից։

Երկու հոգին ՀՀ քաղաքացի են (45 եւ 27 տարեկան), մեկը՝ Իտալիայի (51 տարեկան), ով աշխատում Է Հայաստանում։ Երեքն էլ ժամանել են Իտալիայից: Իտալիայի քաղաքացին եւ ՀՀ քաղաքացիներից մեկը գանգատներ չունեն։ ՀՀ քաղաքացիներից մեկը թոքաբորբ է տանում: Բոլոր երեքը գտնվում են «Նորք» ինֆեկցիոն հիվանդանոցում։

Ավելի վաղ տեղեկացրել էինք՝ Առողջապահության համաշխարհային կազմակերպությունը նոր կորոնավիրուսի պանդեմիա է հայտարարել աշխարհում: ԱՀԿ գլխավոր տնօրեն Թեդրոս Ադհանոմ Գեբրեյեսուսը նշել էր.

«Առաջիկա օրերին և շաբաթներին ակնկալվում է, որ կորոնավիրուսով համակված երկրների, վարակվածների և մահացության դեպքերի թիվը կավելանա: Այն գնահատականին ենք եկել, որ COVID19 կորոնավիրուսը կարող է բնութագրվել որպես համավարակ»:

Նշենք՝ համավարակ են անվանում արտասովոր ուժեղ տարածում գտած համաճարակը, որը բնութագրվում է ինֆեկցիոն հիվանդության տարածմամբ երկրի ողջ տարածքում, ինչպես նաև հարևան երկրների, երբեմն էլ՝ աշխարհի բազմաթիվ երկրների տարածքներում: