«Գաղափարի ուժն է, որ պայքարը պիտի հասցնի հաղթական ավարտի». Արցախի հերոսն այսօր կդառնար 56 տարեկան

Այսօր Արցախի հերոս, ՀՅԴ Շուշիի առանձին հրաձգային  գումարտակի հրամանատարի տեղակալ Պետրոս Ղևոնդյանի՝ լեգենդար Պետոյի ծննդյան օրն է:

Ազատամարտիկը ծնվել է 1964 թ. հունվարի 30-ին, Պռոշյան գյուղում: 1990 թ. անդամակցել է Հայ Յեղափոխական Դաշնակցությանը: 1990-1994 թթ. մասնակցել է ՀՀ սահմանամերձ շրջանների ու ԼՂՀ Շահումյանի, Մարտակերտի, Մարտունու և Հադրութի շրջանների տասնյակ բնակավայրերի ազատագրման մարտերին, Քարվաճառի թշնամական հենակետերի ոչնչացման գործողություններին:

Զոհվել է 1994 թ. փետրվարի 14-ին՝ Քարվաճառում՝ վիրավոր զինակցին օգնություն ցուցաբերելիս:

Աճյունն ամփոփված է հայրենի գյուղի Ազատամարտի պանթեոնում:

ԵՊՀ ռադիոֆիզիկայի ֆակուլտետի ազատամարտիկ-շրջանավարտի անունով են անվանակոչվել Պռոշյանի և Եղեգնուտի միջնակարգ դպրոցները։

2007 թվականին նրա հարազատ ֆակուլտետում բացվեց Պետրոս Ղևոնդյան անունը կրող լսարան։ 2010 թ. ապրիլի 10-ին Քաշաթաղի շրջանի Տիգրանավան գյուղի միջնակարգ դպրոցն անվանակոչվել է Պետրոս Ղևոնդյանի անվամբ:

Պետրոս Ղևոնդյանը հետմահու (2000 թ.) արժանացել է Արցախի հերոսի կոչման:

Yerkir.am-ի հետ զրույցում ՀՅԴ Պռոշյանի Կոմիտեի ներկայացուցիչ Էդուարդ Թովմասյանը նշեց, որ Պետոյի յուրաքանչյուր տարեդարձ նշվում է ըստ պատշաճի. գյուղի՝ հերոսի անունը կրող  դպրոցում տեղի են ունենում մի շարք միջոցառումներ, որոնք շարունակվում են Ազատամարտի պանթեոնում:

Այս օրը Պետոյին նվիրված միջոցառումներ են տեղի ունենում նաև ՀՅԴ Պռոշյանի «Դրո Կանայան» կենտրոնում: