Իտալիան առաջարկել է Լիբիա ուղարկել եվրոպացի խաղաղապահներին

Իտալիայի ԱԳՆ ղեկավար Լուիջի Դի Մայոն առաջարկել է ԵՄ ձևաչափով խաղաղապահներ ուղարկել Լիբիա՝ ներքաղաքական հակամարտությունը կարգավորելու համար. ըստ Yerkir.am-ի՝ հայտնում է «ՌԻԱ Նովոստին»:

«Իսկ ինչո՞ւ ոչ: Դա կլիներ միակ միջոցը երկրի ներքին գործերին միջամտությունը դադարեցնելու համար: Նման առաջարկով պետք է հանդես գան լիբիացիները և հավանության արժանանա ՄԱԿ-ի կողմից: Այն չպետք է լինի հարկադրանքով: Կանգնել և նայել թե ինչպես են հակամարտող կողմերը պատերազմում՝ այլընտրանք չէ», - հայտարարել է նախարարը:

Իտալիայի ԱԳՆ ղեկավարը մի շարք գրառումներ է կատարել լիբիական հակամարտության լուծման վերաբերյալ: Դի Մայոն նշել է, որ Թուրքիա կատարած այցի ընթացքում Լիբիայում աշխատանքներ վարելու ուղղությամբ մի շարք համաձայնություններ է ձեռք բերվել Իտալիայի, Ռուսաստանի և Թուրքիայի միջև:

Հիշեցնենք՝ դեռևս շաբաթ օրը ՌԴ և Թուրքիայի նախագահներ Վլադիմիր Պուտինն ու Ռեջեփ Թայիփ Էրդողանը հորդորել էին բոլոր կողմերին դադարեցնել կրակը հունվարի 12-ի կեսգիշերից և անհապաղ նստել բանակցային սեղանի շուրջ։

Կողմերը ողջունել էին նախաձեռնությունը՝ խոստանալով պատասխանել հրադադարի ցանկացած խախտման։

Իսկ այսօր Մոսկվայում նախատեսվում է հակամարտող կողմերի ղեկավարների՝ Լիբիայի ազգային բանակի ղեկավար, մարշալ Խալիֆա Հաֆթարի և Լիբիայի Ազգային համաձայնության կառավարության վարչապետ Ֆայեզ Սարաջի միջև հանդիպումը: