Անհայտ անձինք հայտնել են Մոսկվայի մետրոյի բոլոր կայարանների ականապատման մասին ու սպառնացել պայթեցնել կայարանները

Այսօր կեսօրին ՌԴ արտակարգ իրավիճակների ծառայություն անանուն հեռախոսազանգեր են ստացվել Մոսկվայի մետրոպոլիտենի բոլոր կայարանների ականապատման և կայարանների պայթեցման սպառնալիքով. ըստ Yerkir.am-ի՝ հայտնում է ՌԻԱ «Նովոստի»-ն։ 

Մետրոյի կայարաններից բացի, ստուգվում են նաև «Եվրոպական» առևտրի կենտրոնը և երկու շրջանային դատարաններ, որոնք նույնպես ստացել են նույն սպառնալից տեղեկատվությունները:

«Ստացվել են Մոսկվայի մետրոյի բոլոր կայարանների, «Եվրոպական» առևտրի կենտրոնի և երկու շրջանային դատարանների պայթեցման մասին անանուն սպառնալիքներ»,- գործակալությանը տեղեկացրել է արտակարգ իրավիճակների ծառայության ներկայացուցիչը:

Մոսկվայի և Սանկտ Պետերբուրգի մետրոկայարանների, դատարանների և սոցիալական կառույցների «ականապատման» ալիքը շարունակվում է արդեն երկու շաբաթից ավելի:

Հատուկ ծառայությունները, սակայն, ոչ մի անգամ վտանգավոր կամ պայթուցիկ նյութեր չեն հայտնաբերել: