Արցախի անվտանգությունը զիջումների ենթակա չէ. Աննա Նաղդալյանի պատասխանը Մամեդյարովին

 Լեռնային Ղարաբաղի հակամարտության կարգավորման հարցում Հայաստանի դիրքորոշումը հստակ ներկայացվել է Բրատիսլավայում վերջերս տեղի ունեցած ԵԱՀԿ ԱԳ նախարարների խորհրդի նիստում ԱԳ նախարար Զոհրաբ Մնացականյանի ելույթում, այս մասին, ըստ՝ Yerkir.am-ի ասել է ԱԳՆ մամուլի քարտուղար Աննա Նաղդալյանը, անդրադառնալով Ադրբեջանի ԱԳ նախարար Էլմար Մամեդյարովի հարցազրույցը: Այս փուլում ոչ մի փաստաթուղթ չի քննարկվում: Այս մասին դեկտեմբերի 13-ին ճեպազրույցի ժամանակ ասաց ԱԳՆ մամուլի քարտուղար Աննա Նաղդալյանը՝ մեկնաբանելով Ադրբեջանի ԱԳ նախարար Էլմար Մամեդյարովի հարցազրույցը: «Նախարարը նշեց, որ Ղարաբաղյան հիմախնդրի կարգավորումը Արցախի ժողովրդի ինքնորոշման իրավունքի ճանաչումն է՝ առանց հարկադրանքի եւ սահմանափակումների: Առանց սահմանափակումների նշանակում է, որ Արցախի ժողովուրդը կարող է ընտրել ցանկացած տարբերակ՝ Ադրբեջանի տարածքային ամբողջականությունից եւ իրավազորությունից դուրս: Տարբերակները, որոնք չեն ապահովում այս իրավունքի իրականացմանը, չեն կարող ընդունելի լինել Հայաստանի համար»,- ասաց Աննա Նաղդալյանը: Ինչ վերաբերում է Մամեդյարովի այն հայտարարություններին, թե իր համար հստակ չէ՝ ինչ է Հայաստանը հասկանում անվտանգության մասին խոսելիս, Նաղդալյանը հիշեցրեց, որ երեք տասնամյակ Ադրբեջանի վարած հայերի հանդեպ ատելության քաղաքականությունը ցույց է տվել իրերի իրական վիճակը: «Վերջերս Իլհամ Ալիեւը հայերին մեղադրեց Սումգայիթի ջարդերի մեջ: Նման միջավայրում անիմաստ է դիտարկել անվտանգության ապահովման հնարավորությունը: Գեղեցիկ խոսքերով ճշմարտությունը չես թաքցնի: Արցախի անվտանգությունը զիջումների ենթակա չէ»,- շեշտեց Նաղդալյանը՝ նշելով, որ ադրբեջանական կողմը կա՛մ ընկալման խնդիրներ ունի, կա՛մ չի ցանկանում հասկանալ: «Կարծում են, որ նրանք պարզապես ձեւացնում են, որ արդարացնեն մաքսիմալիստական դիրքորոշումը»,- նշեց ԱԳՆ մամուլի քարտուղարը՝ ընդգծելով, որ չի ստացվի հայկական կողմի հետ սպառնալիքների լեզվով խոսել: Խոսելով հաջորդ հանդիպման ժամկետների մասին՝ Նաղդալյանը հիշեցրեց, որ կողմերը դրա մասին հայտնում են մանրամասները համաձայնեցնելուց հետո եւ միաժամանակ: Մանրամասներն առայժմ քննարկվում են, նշեց նա: