Ավետիք Իշխանյանն ու Արտակ Բեգլարյանը պատրաստ են իրենց խոսքով և վճարվող գումարով երաշխավորել Արսեն Բաբայանի խափանման միջոցը փոխելը

Իրավապաշտպան, «Հայաստանի Հելսինկյան կոմիտե» ՀԿ-ի նախագահ Ավետիք Իշխանյանը և Արցախի Հանրապետության Մարդու իրավունքների պաշտպան Արտակ Բեգլարյանը (անձնական կարգավիճակով) գրավոր դիմել են քրեական հետապնդման մարմիններին՝ պատրաստակամություն հայտնելով իրենց խոսքով և վճարվող գումարով երաշխավորել Արսեն Բաբայանի պատշաճ վարքագիծը քրեական գործի քննության ընթացքում: Այս մասին իր ֆեյսբուքյան գրառման միջողով տեղեկացնում է Արսեն Բաբայանի պաշտպաններից Երվանդ Վարոսյանը

Նա, մասնավորապես, նշել է. 

«Նշված երաշխավորագրերի հիման վրա հսկող դատախազին միջնորդություն ենք ներկայացրել Արսեն Բաբայանի նկատմամբ ընտրված խափանման միջոց կալանավորումը անձնական երաշխավորությամբ փոփոխելու և Արսեն Բաբայանին ազատ արձակելու մասին»:

Ավելի վաղ տեղեկացրել էինք, որ ԱԺ աշխատակազմի ղեկավարի նախկին տեղակալ Արսեն Բաբայանի պաշտպանները միջնորդություն են ներկայացրել նրա նկատմամբ ընտրված խափանման միջոց կալանավորումն անձնական երաշխավորությամբ փոփոխելու և Արսեն Բաբայանին ազատ արձակելու մասին:

Հիշեցնենք, որ Արսեն Բաբայանը ձերբակալվել է հոկտեմբերի 21-ին՝ պաշտոնեական կեղծիք կատարելու կասկածանքով: