Պոմպեոյի ավագ խորհրդականը հրաժարական է տվել Ուկրաինային վերաբերող գործի պատճառով

ԱՄՆ պետքարտուղարի ավագ խորհրդական Մայքլ Մաքքինլին հրաժարական է տվել. տեղեկացնում է The Wall Street Journal-ը:

Աղբյուրի տեղեկություններով՝ Մաքքինլին հիասթափված էր պետքարտուղարի կողմից այն դիվանագետներին ցուցաբերված անբավարար աջակցությունից, որոնք կապված էին ԱՄՆ-ի կողմից Ուկրաինայի իշխանությունների վրա իբրև գործադրված ճնշման գործի հետ և ցուցմունք տալու էին կանչվել ԱՄՆ նախագահ Դոնալդ Թրամփի իմպիչմենտի ընթացակարգի շրջանակում:

Մաքքինլին առանձնապես մտահոգված էր Ուկրաինայում ԱՄՆ դեսպան Մարի Յովանովիչի պաշտոնաթողությունից այն բանից հետո, երբ լրատվամիջոցները նրան մեղադրեցին կառավարության նկատմամբ լոյալ չլինելու մեջ: Թրամփի փաստաբան Ռուդոլֆ Ջուլիանին այն ժամանակ հայտարարել էր, որ ԱՄՆ նախագահը Պոմպեոյին խնդրել էր նրան հեռացնել պաշտոնից:

Մայքլ Մաքքինլին ուղղակիորեն կապված չէր Ուկրաինայի օրակարգի հետ: Տարբեր ժամանակներում նա ԱՄՆ դեսպանն է եղել Աֆղանստանում, Կոլումբիայում, Պերուում և Բրազիլիայում: Վերջին շրջանում նա զբաղվում էր Վենեսուելայի, Մեքսիկայի և Աֆղանստանի հետ միջազգային հարաբերություններով։