Դա նշանակում է ուսադիրները գցել աղբամանը. Փաշինյանը՝ Վանեցյանի հրաժարականի տեքստի մասին

Լինելով վարչապետին ենթակա մարմնի ղեկավար՝ Արթուր Վանեցյանը հայտարարություն է արել իր ղեկավարի դեմ, դրանից ավելի մեծ անարգանք սպայի պատվի համար չկա: Այս մասին Լոս Անջելեսում լրագրողների հետ զրույցում ասաց ՀՀ վարչապետ Նիկոլ Փաշինյանը՝ անդրադառնալով ՀՀ ԱԱԾ նախկին տնօրեն Արթուր Վանեցյանի հրաժարականի տեքստին:

Նա նշեց, որ դա անարգանք է Հայաստանի զինված ուժերի նկատմամբ, մանավանդ, որ հայտարարությունը տեղադրվել է նույնիսկ ԱԱԾ պաշտոնական կայքում:

«Սպան էդպիսի բան անի՞: Դա նշանակում է ուսադիրները գցել աղբամանը: Վերջին անգամ 1991 թվականի պուտչիստներն են այդպիսի բան արել: Եվ ես շատ ուրախ եմ, որ հայ հասարակությունը շատ հստակ դրա գնահատականը տվել է»,- մանրամասնեց վարչապետը:

Հիշեցնենք, որ ԱԱԾ տնօրենի պաշտոնից հրաժարական տված Արթուր Վանեցյանը հայտարարություն էր տարածել, որում նշել էր. «Պետականաշինությունն իր տրամաբանությունն ունի` որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։ Այն ընդհանուր ոչինչ չունի սպայի արժանապատվության հետ. սպայի ուսադիրն ու զարգացումների նման ընթացքն անհամատեղելի են։ Իմ հրաժարականը թող լինի «Կանգ ա՛ռ»-ի սթափեցնող քայլ, մնացած բոլոր տարբերակներում կհաղթանակի հայրենիքի հանդեպ պարտքը»: