Դատարանը թույլ տվեց Սեյրան Օհանյանին՝ մեկնել Գերմանիա

Պաշտպանության նախկին նախարար Սեյրան Օհանյանի պաշտպան Ինեսսա Պետրոսյանը միջնորդեց դատարանին, որպեսզի իր պաշտպանյալի նկատմամբ կիրառված խափանման միջոցը՝ ստորագրությունը չհեռանալու մասին, փոխվի:

«Իմ պաշտպանյալը բուժման նպատակով պետք է Գերմանիա մեկնի: Նա հոկտեմբերի 21-ին պետք է հիվանդանոցում լինի, պրոթեզավորման խնդիր ունի և 2 տարին մեկ անգամ գնում է Գերմանիա: Դա կտևի 1-2 շաբաթ»,- նշեց փաստաբանը:

Երևանի դատախազ Գևորգ Բաղդասարյանը նշեց, որ սկզբունքային առարկություն այս հարցով չունեն, բայց դատարանը պետք է ունենա բավարար երաշխիքներ, որ Սեյրան Օհանյանը կվերադառնա իր նշած ժամկետներում:

«Այդպիսի երաշխիք մենք համարում ենք այլ խափանման միջոցի կիրառումը, որը չի ենթադրում սահմանահատման արգելք, այդպիսին կարող է լինել «անձնական երաշխավորություն» խափանման միջոցը»,- նշեց նա:

Դատարանը թույլ տվեց Սեյրան Օհանյանին հոկտեմբերի 18-ից նոյեմբերի 4-ն ընկած ժամանակահատվածում գտնվել երկրից դուրս: