Երևանի տրանսպորտային ցանցի պատրաստի նախագիծը Հայկ Մարությանի սեղանին է, բայց դա նրա «հագով չէ». Հրանտ Եղիազարյան

Yerkir.am-ն այսօր Փոխադրողների միության նախագահ Հրանտ Եղիազարյանից հետաքրքրվեց՝ ինչո՞ւ թե՛ նախկին, թե՛ ներկայիս կառավարություններին չի հաջողվում լուծել, իրենց իսկ բնորոշմամբ, «անթրաշ, չստիկներով, սիգարետը բերաններին» տաքսիստների հարցը: Պատասխանեց՝ ընդամենը բավարար կամք ու խստապահանջություն է անհրաժեշտ:  Ասաց նաև, որ տաքսիստների մասով օրենքի «մակարդակն իջել է՞, ու ավելի շատ առավելություններ են տրվել տաքսիստներին։ 

«Վարորդների բուժզննում չեն անցնում, մեքենաների պատշաճ տեխսպասարկում չի իրականացվում»,- նշեց մեր զրուցակիցը:

Հարցին, թե ի՞նչ վիճակում է մայրաքաղաքի տրանսպորտային ցանցը, և ի՞նչ եղավ դեռ նախորդ իշխանությունների ժամանակ եվրոպական ընկերություներից մեկին պատվիրված շուրջ 850 մլն եվրոյի նախագիծը, Եղիազարյանն արձագանքեց. «Նախ՝ ասեմ, որ տրանսպորտային ցանցի վիճակը վատ է ու գնալով ավելի է վատանալու, որովհետև այս տարվա վերջին գործածությունից դուրս է գալու 400 միկրոավտոբուս, և դեռ հայտնի չէ, թե դրանք ինչպես են լրացվելու: Ինչ վերաբերում է դեռ Տարոն Մարգարյանի ժամանակ պատվիրված ու արդեն պատրաստի նախագծին, ապա այն Հայկ Մարությանի սեղանին է, ուղղակի անհասկանալի պատճառներով Մարությանը չի ցանկանում կյանքի կոչել այդ նախագիծն ու առաջնորդվել դրանով»:

Ճշտող հարցին՝ ինչո՞ւ, կա՞մք չունեն, մեր զրուցակիցը չցանկացավ պատասխանել, միայն նշեց, որ երևի դա Հայկ Մարությանի «հագով» չէ: