Հայկ Մարությանի ելույթը միտինգային, «կաբինետային» խոսակցություն էր. Հրանտ Վարդանյան

Հայկ Մարությանի երեկվա հայտարարությունն ուղղակի անլուրջ կգնահատեմ. լրագրողների հետ զրույցում կարծիք հայտնեց ռեժիսոր Հրանտ Վարդանյանը՝ անդրադառնալով Մարությանի երեկվա հայտարարությանը, թե Հայաստանում իրավիճակը շատ պարզ է՝ կան սպիտակ ուժեր, և կան սև ուժեր:

Վարդանյանի խոսքով՝ Մարությանի ելույթը ոգևորության պոռթկում կարելի է դիտարկել: «Չեմ կարծում, թե սա նրանց թիմի մտածողության արդյունքն է, քանի որ նրանք փողոց են դուրս եկել, որպեսզի հնարավոր չլինի հասարակությունը սև-սպիտակի բաժանել: Այնուամենայնիվ, կարծում եմ, որ ժարգոնը պետք է դուրս գա պետական գործիչների բերանից: Սա պետություն է, բոստան չէ»,- ասաց նա:

Ռեժիսորը նշեց, որ չգիտի՝ Հայկ Մարությանն ինչպիսի քաղաքապետ կլինի՝ լա՞վ, թե՞ վատ, բայց, որպես մարդու, լավ է վերաբերվում նրան: «Գուցե դերի մեջ է Հայկը մտել, որը սխալ է: Սայթաքում էր, որին ես լուրջ չեմ վերաբերվում: Իհարկե, լուրջ չէ, երբ պատրաստվում են մեզնից ձայն ստանալ, և նրանցից լուրջ խոսք չես լսում, ծրագիր չես լսում: Կուզեի լսել Հայկի տեսնելը, այսինքն՝ ինչպիսին է տեսնում Երևանը: Իսկ երեկվա ելույթը «կաբինետային», միտինգային խոսակցություն էր»,- ասաց Վարդանյանը: