Իսրայելը Թուրքիային Ֆ-35 չվաճառելու նպատակով լոբբինգ է իրականացրել ԱՄՆ-ում

Իսրայելցի պաշտոնյաները Վաշինգտոնում ճնշում են գործադրել և լոբբինգ իրականացրել, որպեսզի ԱՄՆ-ը Թուրքիային Ռուսաստանից Ս-400 ՀՕՊ համակարգերի գնման պատճառով դուրս թողնի Ֆ-35 կործանիչների ծրագրից. հաղորդում է diken.com.tr կայքը:

Իսրայելական The Times of Israel կայքի համաձայն`  իսրայելցի բարձրաստիճան պաշտոնյաները Channel 12 հեռուստաընկերությանը հայտնել են, որ Իսրայելը տարածաշրջանում ռազմական գերիշխանությունը պահպանելու նպատակով երկարատև լոբբինգ է իրականացրել, որպեսզի ԱՄՆ-ը Թուրքիային դուրս թողնի կործանիչների ծրագրից: Անունները հայտնել չցանկացած իսրայելցի պաշտոնյաները տեսակետ են հայտնել, որ Ս-400-ների առկայության դեպքում հարևան երկրների Ֆ-35 կործանիչները կկորցնեն իրենց ուժը:

Իսրայելը ամերիկյան Lockheed Martin ռազմաարդյունաբերական ընկերությունից գնել է 50 հատ Ֆ-35 կործանիչ, սակայն դեռևս 16 հատն է ստացել: Իսկ Թուրքիան 1.4 մլրդի համաձայնագիր էր կնքել, ըստ որի` պետք է ստանար 100-ից ավելի կործանիչ, սակայն պատժամիջոցների պատճառով զրկվել է մատակարարումից: