Սկրիպալը Ռուսաստան չի վերադառնա. զարմուհի

Ռուս նախկին լրտես Սերգեյ Սկրիպալը, որին թունավորել էին Սոլսբերիում,  դժվար թե վերադառնա Ռուսաստան: Այդ մասին РИА Новости-ին ասել է նրա զարմուհին` Վիկտորյա Սկրիպալը, և հավելել, որ նա ամսվա մեջ մեկ անգամ անալիզներ է հանձնում և բուժզննում անցնում:

«Ես գիտեմ, որ նրանք` Սկրիպալը և նրա դուստրը,  Մեծ Բրիտանիայի տարածքում են: Այսպես է ասում Սերգեյ Վիկտորովիչը: Նրանք հետևում են իրենց առողջությանը։ ՌԴ վերադառնալ չեն պատրաստվում:  Դա նրանց իրավունքն է, նրանց ընտրությունը, թեև, հնարավոր է, որ նրանցը չէ»,- ասել է Վիկտորյան:

Նրա խոսքով` ինքը նախկինի պես վստահ է, որ Սկրիպալները բրիտանական իշխանությունների վերահսկողության տակ են:

Սկրիպալը մինչև 1999 թվականն աշխատել է ՌԴ գլխավոր հետախուզական վարչությունում, հետո` թոշակի անցել: 2004-ին նրան ձերբակալել են Բրիտանիայի օգտին լրտեսություն անելու մեղադրանքով և 13 տարվա ազատազրկման դատապարտել: Սկրիպալը մեղավոր է ճանաչվել այն բանում, որ, 1995-ից սկսած, գաղտնի տեղեկություններ է փոխանցել Բրիտանիայի հետախուզական ծառայությանը:

2010-ին Սկրիպալը և ՌԴ-ում դատապարտված ևս երեք անձ համաներման են արժանացել, ինչից հետո նրանց փոխանակել են ԱՄՆ-ում բացահայտված` ռուսական հետախուզության 10 գործակալների հետ: Փոխանակումից հետո Սկրիպալը բնակություն է հաստատել Բրիտանիայում: