Թիրախավորվել են Ալեն Սիմոնյանի արտագնա այցերը. «Մեդիա պաշտպան»

2019 թ-ի հուլիսի 11-ից 20-ը «Մեդիա պաշտպան» նախաձեռնությունը հետևել է առցանց մամուլում ՀՀ ԱԺ փոխնախագահ Ալեն Սիմոնյանի անձին ու գործունեությանն առնչվող հոդվածներին։ Մշտադիտարկվել է ներհայաստանյան 35 առաջատար լրատվական կայք։

Նշված ժամանակահատվածում հայտարարագրել է 30 հոդված, որոնցից 22-ը եղել է բացասական, 1-ը՝ դրական, 7-ը՝ չեզոք:

ԱԺ փոխխոսնակ Ալեն Սիմոնյանն այս տասնօրյակում լրատվականների ուշադրության կենտրոնում չի եղել, սակայն մշտադիտարկման արդյունքում ստացված գրաֆիկական պատկերը սփոփիչ չէ։ Լրատվականներն անդրադարձել են Ալեն Սիմոնյանի ԱՄՆ-ում գտնվելու ժամանակահատվածում սուշի ուտելու փաստին։ 

Ըստ մամուլի հրապարակումների՝ այդ փաստը որոշ քննադատությունների էր արժանացել, որովհետև թանկարժեք ռեստորանում էր իրականացվել համտեսը, և հավելում են, որ քննադատություններից հետո փոխխոսնակը կոչ է արել մարդկանց «գցվել» ու նրան քննադատողները հայտնվել են սև ցուցակում։

Քննադատության է արժանացել նաև Ալեն Սիմոնյանի այցը Մոսկվա։ Ըստ լրատվականների՝ այդ այցի ընթացքում Ալեն Սիմոնյանը պատվիրակության հետ դուրս է եկել հյուրանոցից վաղ առավոտյան, իսկ զգեստափոխվել է ավտոբուսում։ Ալեն Սիմոնյանն այդ այցի ընթացքում հանդիպել է Պետդումայի նախագահի տեղակալ Ս. Նևերովի հետ: Լրատվականները նշում են, որ պաշտոնական հանդիպման մասին լուրը կա, բայց պաշտոնական հաղորդագրությունում բացակայում է Ալեն Սիմոնյանի նկարը։

Ստացվում է, որ վերջին տասնօրյակում լրատվականները կենտրոնացել են Ալեն Սիմոնյանի արտագնա այցերի վրա։ Ալեն Սիմոնյանն իր հերթին ներքաղաքական որևէ ակտիվ գործունեությամբ աչքի չի ընկել։ Եթե հրապարակումները համապատասխանում են իրականությանը, ապա խորհրդարանական դիվանագիտությունը պետք է փոխի իր գործելաոճը։