Հայաստանի խուլերի միավորման անդամները բողոքի ակցիա են իրականացնում ընդդեմ ինքնահռչակ նախագահ Գրիգոր Գրիգորյանի. ուղիղ

Հայաստանի խուլերի միավորման անդամները բողոքի ակցիա են կազմակերպել ընդդեմ ինքնահռչակ նախագահ Գրիգոր Գրիգորյանի: Հասարակական կազմակերպության անդամները պնդում են, որ  Գրիգոր Գրիգորյանը կեղծ փաստաթղթեր է ներկայացրել իրավաբանական անձանց ռեգիստր: Նրանք այս պահին գտնվում են ռեգիստրի գործակալության շենքում` լսումներին մասնակցելու նպատակով:

«Անուշ Մկրտչյան անունով մի անձ դիմում է ներկայացրել իրավաբանական անձանց պետական ռեգիստրի գործակալություն, թե իբր «Հայաստանի խուլերի միավորում» հասարակական կազմակերպության կողմից 2019 թ. հուլիսի 2-ին անցկացվել է արտահերթ համագումար, որի արդյունքում նոր նախագահ է ընտրվել Գրիգոր Գրիգորյանը, ինչպես նաև կանոնադրության փոփոխություններ են կատարվել: Այդ մասին Մարինե Հարությունյանը, որն այս պահին «Հայաստանի խուլերի միավորում» ՀԿ-ի գործող նախագահն է, ՀՀ ոստիկանությանը հանցագործության մասին հաղորդում է տվել, որովհետև, ըստ նրա, որևէ արտահերթ համագումար տեղի չի ունեցել, որևէ գործադիր մարմնի ղեկավարի փոփոխություն տեղի չի ունեցել, և ինքը Անուշ Մկրտչյան անուն-ազգանունով որևէ անձի չի ճանաչում, որին լիազորած լինի: Հաղորդման հիման վրա նյութեր են նախապատրաստվում ոստիկանությունում, այս պահին էլ եկել ենք` ներկայանանք լսումներին»,- նշեց գործով փաստաբան Տիգրան Ղազարյանը:

Կազմակերպության անդամ, բողոքի ակցիայի մասնակիցներից մեկի խոսքով էլ` իրենք Գրիգոր Գրիգորյանի հետ շատ վաղուց են հանդիպել. «Բայց խուսափել է մեզ հետ խոսելուց, չի համաձայնել, մինչև օրս չենք հանդիպել»,- նշեց նա:

Ավելի վաղ տեղեկացրել էինք, որ «Հայաստանի խուլերի միավորում» ՀԿ-ն բաց նամակ էր հղել վարչապետ Նիկոլ Փաշինյանին` խնդրելով աջակցել ՀՀ-ում իրենց խախտված իրավունքների վերականգնման և տարիներ շարունակ ճգնաժամի մեջ գտնվող կազմակերպության վերածննդի հարցում:

Մանրամասներին կարող եք հետևել Tert.am-ի` ուղիղ հեռարձակվող տեսանյութում: