Էրդողանը խոստացել է ավելի ուժեղացնել խոսքի ազատությունը

Թուրքիայի նախագահ Ռեջեփ Թայիփ Էրդողանը, ելույթ ունենալով դատական բարեփոխումների ռազմավարության ծրագրին նվիրված միջոցառման ժամանակ, անդրադարձել է Թուրքիայում նախատեսվող դատական բարեփոխումներին:

«Թուրքիան, չնայած չիրականացված բոլոր խոսոտումներին, շարունակելու է ԵՄ անդամակցությանն ուղղված քայլերը: Չնայած ամեն ինչին` մենք հավատում ենք, որ այն կարևոր է ինչպես Եվրոպայի, այնպես էլ մեզ համար: Մենք որդեգրել ենք նոր մոտեցումներ, որոնք էլ ավելի կապահովեն և ավելի առաջ կտանեն խոսքի ազատությունը»,- նրա խոսքերն է մեջբերում sabah.com.tr կայքը:

Նշենք, որ Թուրքիան 1964 թվականից ԵՄ ասոցացված անդամ է, 1987 թ. դիմել է ԵՄ` անդամակցություն ստանալու համար, բանակցությունները սկսվել են 2005 թվականից: 2017 թ. Եվրախորհրդարանը կոչ արեց ԵՄ-ին և Եվրահանձնաժողովին` կասեցնել բանակցությունների գործընթացը, քանի դեռ Թուրքիան փոփոխություններ չի մտցրել Սահմանադրության մեջ, իսկ 2019 թ. Եվրախորհրդարանը հավանություն տվեց Թուրքիայի հետ բանակցություններն առկախելու վերաբերյալ որոշմանը: