Բանակցություններ են գնում, որպեսզի հասկանանք՝ ում ումով ենք փոխանակում. Տոնոյանը՝ գերիների փոխանակման մասին

Ռուսաստանից սպառազինության ձեռք բերման գործընթացն «առողջ» վիճակում է. «Հաղթանակ» զբոսայգում լրագրողների հետ ճեպազրույցում ասաց ՀՀ պաշտպանության նախարար Դավիթ Տոնոյանը: 

«Հաջորդ 8 Սու-30-ները կբերվեն, երբ ժամանակը գա»,- հավելեց նա:

Հարցին` ի՞նչ նկատի ունի, երբ ասում է, որ բանակը զինվում է «խիստ», արդյո՞ք կան դրա հնարավորությունները, նախարարը պատասխանեց, որ հնարավորություններ կան և համապատասխանում են թե' տնտեսական, թե' ժողովրդագրական տվյալներին:

Հարցին՝ սպառազինական հավասարակշռությունը Հայաստանի և Ադրբեջանի միջև վերականգնվա՞ծ է, Տոնոյանը պատասխանեց՝ ՀՀ պաշտպանության նախարարությունը  հավասարակշռության չի ձգտում: «Պաշտպանության նախարարությունը ձգտում է առավելության»,-ընդգծեց նա:

Անդրադառնալով  ՌԴ ԱԳ նախարար Սերգեյ Լավրովի` գերիների փոխանակման վերաբերյալ հայտարարությանը, որ դա հումանիտար քայլ է, Դավիթ Տոնոյանը շեշտեց. «Դրա վերաբերյալ կոնկրետացում է գնում, աշխատանքներ, բանակցություններ են ընթանում, որպեսզի հասկանանք՝ ում ումով ենք փոխանակում: Դեռևս աշխատանքները գնում են»: