Հայկական կողմը ԵԱՀԿ շրջանակում բարձրացրել է Ադրբեջանի չծանուցված զորավարժությունների հարցը, պահանջվել են բացատրություններ. Աննա Նաղդալյան

Ադրբեջանի կողմից լայնածավալ, չհայտարարված` հարձակողական բնույթի զորավարժությունների անցկացումը չի նպաստում ժողովուրդներին խաղաղության պատրաստելուն, վստահության մթնոլորտի ստեղծմանը: Այս մասին լրագրողների հետ ճեպազրույցում ասաց Հայաստանի ԱԳՆ մամուլի քարտուղար Աննա Նաղդալյանը:

«Հարցը բարձրացվել է ԵԱՀԿ շրջանակում, Ադրբեջանից համապատասխան բացատրություններ են պահանջվել: Խաղաղության նախապատրաստմանը չնպաստելու առումով  նույնը վերաբերում է նոր զորամասի տեղակայմանը սահմանամերձ գոտում և Ադրբեջանի կողմից ականանետի կիրառմանը։ Ե'վ Հայաստանը, և' Արցախը վճռական են և ունեն պաշտպանվելու ու հակահարված հասցնելու կարողություն: Թող ոչ ոք սա կասկածի տակ չդնի: Հենց այս վճռականությամբ է պայմանավորված  մեր հանձնառությունը` ձեռնարկել քայլեր խաղաղության հաստատման ուղղությամբ»,- ընդգծեց Նաղդալյանը՝ հույս հայտնելով, որ հակամարտող կողմերը հանձնառու կլինեն Դուշանբեում ձեռք բերված պայմանավորվածությունների կատարմանը: