Ստեփանավան խոշորացված համայնքի կազմում գտնվող Կաթնաղբյուր գյուղում չինական ընկերությունը  պատրաստվում է ջրի արտադրության գործարան հիմնել: Այս մասին լրագրողների հետ հանդիպմանն ասաց Տարածքային կառավարման և զարգացման նախարար Սուրեն Պապիկյանը:

«Ընկերությունը պատրաստ է 5 մլն դոլարի ներդրում կատարել  ջրի արտադրության գործարան հիմնելու համար: Սրանով հիմա կառավարությունը զբաղվում է: Բացի այս, ավելի մեծամասշտաբ ներդրումային մի ծրագիր կա, որը դեռ պարզ չէ, թե որ մարզում է լինելու: Այն պահանջում է մոտավորապես 30-40 հա հեկտար տարածք, որը մոտ կլինի մայրուղուն, խնդիր չի ունենա գազի, լույսի և մեծ քանակությամբ ջրի: Ցավոք, Հայաստանը ենթակառուցվածքների մասով խնդիր ունի, բայց կառավարությունը կարծում է, որ նմանատիպ ծրագրերի համար պետք է պատրաստ լինել գործարարին ապահովել այդ ամենի հասանելիությունը, որքան էլ ծախսը մեծ լինի, քանի որ այն ապահովելու է 1000-ավոր աշխատատեղեր»,-նշեց նա: