Հայաստանն ունի մասնագիտական բավականաչափ ներուժ մեքենաշինության ոլորտում Իրանի հետ համագործակցության համար. Նիկոլ Փաշինյան

Իրանական ներդրողները կարող են իրենց ապագա ծրագրերը քննարկել հայաստանյան գործընկերների և համապատասխան կազմակերպությունների հետ, իսկ Հայաստանի պետական մարմինները մշտապես պատրաստ են անհրաժեշտության դեպքում օգնություն ցույց տալ: Այս մասին IRNA գործակալությանը տված հարցազրույցում ասել է  ՀՀ վարչապետ Նիկոլ Փաշինյանը՝ պատասխանելով հարցին, թե կարո՞ղ են Իրանն ու Հայաստանը համագործակցել մեքենաշինության կամ արդյունաբերական այլ բնագավառներում:

Նիկոլ Փաշինյանն ընդգծել է, որ Հայաստանի կառավարությունն ամեն կերպ աջակցում է արտասահմանյան, այդ թվում՝ իրանական ներդրումային ծրագրերի իրականացմանը, և մատնանշել 2018թ. դեկտեմբերին Վանաձորում բացված պլաստմասսայե հիմքի վրա արտադրվող գազաբալոնների հայ-իրանական համատեղ գործարանը:

Անդրադառնալով զբոսաշրջության ոլորտում հայ-իրանական համագործակցության հեռանկարների վերաբերյալ հարցին՝ ՀՀ վարչապետն ընդգծել է, որ յուրաքանչյուր պետություն աշխարհին ներկայանում է իր պատմությամբ, մշակույթով, ավանդույթներով։ «Զբոսաշրջության զարգացումը մեր երկրի առաջնահերթություններից է, և մենք մեծ ջանքեր ենք գործադրում մեր երկիրը զբոսաշրջիկների համար գրավիչ դարձնելու ուղղությամբ:  2016 թվականին մուտքի արտոնագրի վերացումից հետո զգալիորեն աճել է ՀՀ ժամանող իրանցի զբոսաշրջիկների թիվը, հատկապես` իրանական ամանորի՝ Նովրուզի օրերին: Այդ օրերին հատուկ միջոցառումներ են ձեռնարկվում իրանցի զբոսաշրջիների անվտանգության, տեղեկացվածության ապահովման ուղղությամբ, շուրջօրյա գործում է 911 ծառայությունը՝ պարսկերենով: Կարծում եմ, որ զբոսաշրջությունը հեռանկարային բնագավառ է, և ցուցանիշներն այդ բնագավառում աճելու միտում ունեն»,- ասել է Փաշինյանը: