Երբ հուզական վիճակ է լինում, Նիկոլ Փաշինյանը սկսում է չարաշահել օտար բառերը. Լեզվի կոմիտեի նախագահ

ԿԳՆ Լեզվի կոմիտեի նախագահ Դավիթ Գյուրջինյանն այսօր լրագրողների հետ հանդիպման ժամանակ անդրադարձել է հեռուստաեթերի լեզվի թեմային:

Նրա համոզմամբ՝ ՀՀ կառավարության ծրագրում լեզվաքաղաքականությանն առնչվող դրույթների ընդգրկումը կարևոր ձեռքբերում է:

 Այդ դրույթներից է անհրաժեշտ պայմանների ստեղծումը հայերենի գործառության ու զարգացման համար: Մյուս դրույթը կապված է հեռուստաեթերի լեզվի հետ: Հեռուստատեսային եթերը պետք է մաքրվի հանրային հարաբերություններին փոխադարձ արհամարհանքի և ագրեսիվության ենթատեքստ հաղորդող բովանդակությունից, ինչպես նաև լեզվական ցածրորակ արտադրանքից։ Կրթական և մշակութային քաղաքական առանցքային նպատակը պետք է լինի գրական հայերենի տարածումը, նախադպրոցական և դպրոցական ցածր տարիքի լսարանի համար հատուկ ծրագրերի միջոցով գրական հայերենի (այդ թվում՝ արևմտահայերենի) իմացության ամրապնդումը Հայաստանում և Սփյուռքում:

«Եթերը պետք է մաքրվի լեզվական ցածրորակ արտադրանքից: Մենք պետք է աջակցենք, համագործակցենք հեռուստաընկերությունների հետ: Նրանք զգում են մեր շնչառությունն իրենց թիկունքին: Եթե նախկինում մեր կառույցը պատժիչ ջոկատի դեր էր կատարում, ապա այսօր մենք գործընկեր ենք, աջակից ենք: Մեր նպատակը հայերենի տարածումն ու զարգացումն է»,-ասաց Դավիթ Գյուրջինյանը:

Դավիթ Գյուրջինյանի խոսքով՝ խնդրահարույց են հատկապես սերիալները, որի  լեզուն անորակության սանդղակով առաջնագծում է: Ինչ վերաբերում է ամենատարածված սխալներին, ապա Դավիթ Գյուրջինյանը նշեց, որ դրանք կարելի է տեսնել կոմիտեի հորդորակների միջոցով, որոնք պարբերաբար հրապարկվում են կայքերում, թերթերում:

Անդրադառնալով վարչապետի ուղիղ եթերներին նա նշեց, որ Նիկոլ Փաշինյանը վերջին շրջանում սկսել է չարաշահել օտար բառերը:

«Պատճառը չգիտեմ ինչն է: Նա ընդհանրապես կանոնավոր լեզու ունի, բայց երբ հուզական վիճակ է լինում, հսկողությունը մարդը կորցնում է»,-ասաց նա: