Գաղտնալսման դեպքից հետո զրուցել ենք դատավորի հետ. Գագիկ Հարությունյան

ԱԱԾ տնօրենի և ՀՔԾ պետի գաղտնալսված հեռախոսազրույցում դատավորներին հրահանգ տալու մասին էր խոսք գնում: ԲԴԽ նախագահ Գագիկ Հարությունյանն այսօր լրագրողների հետ զրույցում նշեց, որ գաղտնալսման դեպքից հետո զրուցել են դատավորի հետ: Նա հիշեցրեց, որ  դատավորը գրավոր հայտարարություն է տարածել` հավաստիացնելով, որ հաղորդակցման մեջ չի մտել որևէ մեկի հետ : «Իսկ Բարձրագույն դատական խորհուրդն, օրենքով սահմանված կարգով, միայն դատավորի դիմումի առկայության պարագայում կարող է որոշակի քայլեր անել»,- ասաց Հարությունյանը:

Հարցին` անձամբ քաղաքական հրահանգ տեսնո՞ւմ է այդ գաղտնալսման մեջ, նա պատասխանեց, որ չի կարող պատասխանել, քանի որ հետաքննությանը չի մասնակցում: «Սակայն կարող եմ ասել մեկ այլ բան` ցանկացած երևույթ, որը հանրային որոշակի կարծիք է ստեղծում, անթույլատրելի է և մտահոգիչ»,- ասաց Հարությունյանը: